Ўзбекистонда максимал балл тўпласа-да, контрактга кирган абитуриентлар тўғрисида маълумот берилди

Ўзбекистонда максимал балл — 189 балл тўпласа-да, контрактга кирган абитуриентлар тўғрисида маълумот берилди.

2023 йил 23 август куни Ахборот ва оммавий коммуникациялар агентлигида “2023/2024-ўқув йили учун олий таълим муассасаларининг бакалавриат таълим йўналишларига кириш тест синовлари якунлари” мавзусида матбуот анжумани бўлиб ўтди. Матбуот анжуманида 189 балл олган абитуриентлар тўғрисида маълумот берилди. Билим ва малакаларни баҳолаш агентлиги раҳбари Мажид Каримов бу масала давлат комиссияси томонидан кўриб чиқилишини билдириб ўтди. 

“189 балл олган абитуриентлар сони 61 та бўлди. Бундан ташқари, Темурбеклар мактаби битирувчиларига ОТМга киришда 15 фоиз қўшиб берилади. Шу сабабли уларнинг балли 189 баллдан юқори бўлди. Кимга имтиёз берилади, кимга алоҳида квота берилади... Буларнинг ваколати Билимни баҳолаш агентлигида ҳам эмас, Олий таълим вазирлиги ваколатида ҳам эмас. Биринчи навбатда таълим муассасаларига қабул қилиш давлат комиссияси бор. Бу ана шу комиссия ваколатидаги вазифа. Агар имтиёз берилса, ўша асосида ишлаймиз, берилмаса, инобатга олмаймиз. 189 энг максимал балл, бу баллни олган ҳеч қайси абитуриент эътибордан четда қолмайди. Бу масалани давлат комиссияси ҳам кўради. 189 балл олиб контрактга кирса, бу жуда катта муаммо. Бу ўрганилади. Балки Темурбеклар мактаби ҳам алоҳида параметрга киргизилар. Бу қизларимиз баланд балл олиб, ноҳақликка дуч келди, дегани эмас. Биз ҳам бу нарсани таҳлил қилиб, давлат комиссиясига таклиф сифатида киргизамиз”, — дейди Билим ва малакаларни баҳолаш агентлиги раҳбари Мажид Каримов. 

Шунингдек, максимал балл олган абитуриентларга президент гранти берилиши ҳақида Олий таълим, фан ва инновациялар вазирлигининг қабул жараёнларини ташкил этиш бўлими бошлиғи Абдусамат Маманазаров маълумот берди. Унга кўра, ҳар йили энг юқори натижа қайд этган 200 нафар абитуриентларга президент гранти берилади. Бу бўйича таҳлиллар олиб бориляпти. 

“Албатта, 189 балл олган абитуриентлар ажратилган квоталарга тушса керак. Сабаби ҳозир таҳлиллар ўз якунига етмади”, — дейди Абдусамат Маманазаров.