Криминал авторитет Қамчи Кўлбоев Қирғизистон собиқ бош вазирига совға қилган зирҳли автомобиль мусодара қилинди

Қирғизистон Миллий хавфсизлик давлат қўмитаси уюшган жиноий гуруҳ аъзолари Қамчи Кўлбоев томонидан мамлакатнинг собиқ бош вазири Сапар Исоқовга совға қилинган зирҳли машина мусодара қилингани ҳақида хабар берди, деб ёзмоқда “24.kg”.

МХДҚ хабарига кўра, Кўлбоев ва унга алоқадор шахсларнинг ноқонуний орттирилган мол-мулкини аниқлаш бўйича ўтказилган тезкор-қидирув тадбирлари давомида Қирғизистон Республикаси фуқароси Рамонов М.Т. ҳибсга олинган. Гап таниқли спортчи Қирғизистоннинг 12 карра чемпиони, юнон-рум кураши бўйича Осиё чемпионати совриндори, 2016 йилги Рио Олимпиадаси иштирокчиси Мурат Рамонов ҳақида кетмоқда.

Аниқланишича, Рамонов Кўлбоевнинг жиноий йўл билан қўлга киритилган мол-мулкини ўз номига расмийлаштириб, сўнг уларни алоҳида сиёсатчиларга ўтказиб берган. Улар орасида 2017 йилнинг августидан 2018 йилнинг апрелигача Қирғизистон бош вазири лавозимида ишлаган Сапар Исаков ҳам бор. 2018 йилнинг май ойида Исақов коррупцияда айбланган, 2019 йил декабрида у 15 йилга озодликдан маҳрум этилган, бироқ 2020 йил октябрь ойида озодликка чиқарилган.

“2020 йил октябрь ойида Рамонов озодликка чиққан Қирғизистон Республикасининг собиқ бош вазири Исаковга 2015 йилда ишлаб чиқарилган зирҳли Mercedes-Benz С600 русумли автомашинани топширган. 2020 йил 5 октябрь куни Исоқов маълум сиёсатчилар билан биргаликда ушбу автомобилдан марказий Ала-Тоо майдонида оммавий тартибсизликлар уюштириш мақсадида фойдаланган”, — дейилади Миллий хавфсизлик давлат қўмитаси хабарида.

Зирҳли машинанинг нархи 600 минг долларга баҳоланмоқда.

49 ёшли Қамчибек Кўлбоев (“Коля-қирғиз”) Қирғизистондаги энг машҳур криминал авторитетлардан бири бўлган. АҚШ разведка идоралари уни дунёдаги энг йирик наркобаронлар рўйхатига ва собиқ СССР мамлакатларининг энг машҳур 10 та жиноий раҳбарлари қаторига киритган. Кўлбоэвни ҳибсга олиш ёки унинг уюшган жиноий гуруҳининг “молиявий оқимини бузиш”га ёрдам берадиган маълумот учун 5 миллион доллар мукофот эълон қилинган. Кўлбоев шу йилнинг 4 октябрь куни Бишкекда хавфсизлик кучлари томонидан ўтказилган махсус операция давомида ўлдирилди. Миллий хавфсизлик давлат қўмитаси унинг ноқонуний йўллар билан қўлга киритган барча бойликларининг қийматини тахминан 1 миллиард долларга баҳолади.