Доғистон Соғлиқни сақлаш вазирлиги Махачқалъа аэропортидаги тартибсизликлар чоғида 20 дан ортиқ одам яраланганини маълум қилди.
Полиция ходимлари орасида ҳам, тинч аҳоли орасида ҳам ўртача ва жиддий жароҳатланганлар бор. Икки кишининг аҳволи оғир. Енгил жароҳатлар олган яна 10 дан ортиқ одам амбулатор тиббий ёрдамга мурожаат қилди, деб ёзади Доғистон Соғлиқни сақлаш вазирлиги.
Махачқалъа аэропортида нима содир бўлди?
30 октябрга ўтар кечаси Исроилдан йўловчи самолёти етиб келишидан олдин юзлаб одамлар Махачқалъа аэропортига тўпланишди.
Яҳудийларни қидирган оломон аэропортдан чиқаётган машиналарни тўхтатиб, йўловчиларнинг паспортларини текшира бошлади. Сўнгра улар аэропорт биносига бостириб кириб, антисемитизм шиорлари билан ҳайқирди ва учиш-қўниш йўлагигача кириб борди.
Россиянинг Доғистон бўйича Тергов қўмитаси оммавий тартибсизликлар уюштириш моддаси бўйича жиноий иш қўзғатди. Қайд этилишича, тунда исёнчиларнинг аксарияти Махачқалъа аэропортини тарк этган.
Федерал ҳаво транспорти агентлиги хабарига кўра, Махачқалъа аэропорти 31 октябргача самолётларни қабул қилиш учун вақтинча ёпилди.
Чоралар вазият нормаллашгунга қадар амал қилади. Ҳуқуқ-тартибот идоралари воқеа жойида.
Махачқалъага қўниши керак бўлган самолётлар муқобил аэродромларга йўналтирилди, дея қўшимча қилди Федерал ҳаво транспорти агентлиги
Изоҳ (0)