АҚШда намойишчилар Конгресс биносига бостириб кирди. Улар Ғазода ўт очишни тўхтатишни талаб қилди (видео)

АҚШда намойишчилар Вашингтондаги Капитолий холмида Конгрессининг энг қадимий офиси — Каннон Ҳоусга бостириб киришди. Бу ҳақда Axios хабар бермоқда.

Маҳаллий полициянинг маълум қилишича, бир гуруҳ намойишчилар Конгресснинг бошқа бинолари каби намойиш ўтказиш тақиқланган Каннон Ҳоусда митинг учун йиғилган. Улар Ғазо секторида ўт очишни тўхтатишни талаб қилган. Митинг иштирокчиларини тарқатиш учун офицерлар уларга огоҳлантириш берган. Бу талабга риоя қилинмаганидан кейин намойишчиларни ҳибсга олиш бошланган.

Фаластин тарафдорларининг Каннон Ҳоус атрофида тўпланиши транспорт ҳаракатини тўсиб қўйди. Полиция маълумотларига кўра, камида уч намойишчи офицерларга ҳужум қилганликда гумонланиб ҳибсга олинган. ОАВ митингда полиция юзлаб намойишчиларни ҳибсга олгани ҳақида ёзди.

Axios нашрига кўра, АҚШ Конгресси биносидаги митингни Исроилга қарши “Агар ҳозир бўлмаса” ва “Тинчлик учун яҳудийлар овози” гуруҳлари уюштирган.