Доғистондаги вазиятни беқарорлаштиришга уринишлар Россиянинг хориждаги “душманлари” томонидан амалга оширилмоқда, деди республика раҳбари Сергей Меликов.
“Доғистондаги вазиятни беқарорлаштиришга уринишлар, жумладан, миллий адоват ва динлараро муаммоларни қўзғатиш билан боғлиқ тақиқланган усулларни қўллаш бизнинг душманларимиз, мамлакатимизнинг мухолифлари томонидан амалга оширилмоқда”, — деди Меликов журналистларга.
Унинг сўзларига кўра, аҳолини митингларга чақирадиган постларни чоп этувчи Telegram каналларидан бири Украина ҳудудидан назорат қилинади.
Бугун биз “Доғистон тонги” канали Украина ҳудудидан сотқинлар томонидан бошқарилаётгани ҳақида мутлақо ишончли маълумот олдик, — дея қўшимча қилди у.
Республика раҳбари, шунингдек, Махачқалъа аэропортидаги тартибсизликлар чоғида икки полициячи яраланганини айтди.
30 октябрга ўтар кечаси Махачқалъа аэропортида Исроилдан учган самолёт келиши сабабли оммавий тартибсизликлар юз берди. Оломон яҳудийларни қидириш учун терминал биносига, сўнгра учиш-қўниш йўлагига бостириб кирди. Федерал ҳаво транспорти агентлиги аэропортни 31 октябргача ёпди.
Доғистон Соғлиқни сақлаш вазирлиги маълумотларига кўра, тартибсизликлар вақтида 20 дан ортиқ киши жароҳатланган. Улардан 10 нафари касалхонага ётқизилган, икки нафарининг аҳволи ўта оғир.
Изоҳ (0)