Ҳиндистон жануби-шарқидаги Андхра-Прадеш штатида йўловчи поезди рельсдан чиқиб кетди. Тезюрар поезднинг тўхтаб турган йўловчи поезд билан тўқнашиши оқибатида камида ўн уч киши ҳалок бўлди, деб хабар бермоқда NDTV.
Ҳукуматдаги манбанинг маълум қилишича 40 га яқин одам жароҳат олган.
Поезд Андхра-Прадеш штатидаги Визаг шаҳридан Раягаду шаҳрига кетаётган эди. Поезд ҳаракати ҳаво кабелининг узилиши туфайли тўхтаб қолган, шундан сўнг унга тезюрар поезд урилиб кетган. Зарба оқибатида учта вагон рельсдан чиқиб кетган.
Воқеа жойига бир неча тез ёрдам бригадалари юборилди.
Аввалроқ Бангладешда юк ва йўловчи поездининг тўқнашуви оқибатида камида 15 киши ҳалок бўлган, 100 дан ортиқ киши жароҳатланган.
Июнь ойи бошида Ҳиндистонда поездлар тўқнашуви сабаб 300 дан ортиқ одам ҳаётдан кўз юмган.
Изоҳ (0)