Ўзбекистонда камида 65 нафар боланинг ўлимига сабабчи дея қаралаётган “Док-1 Макс” сиропи бўйича бошланган суднинг 25 октябрь куни давом этган навбатдаги мажлисида судланувчи — Фармасевтика тармоғини ривожлантириш агентлиги собиқ раҳбари С.К. ва унинг адвокатларидан бири томонидан судга киритилган илтимоснома муҳокама қилинди.
Адвокат судга илтимоснома киритар экан, нашрнинг “ъДок-1 Максъ сиропи қайта рўйхатдан ўтказилаётган пайтда GMP сертификати бўлмаса-да, Ўзбекистондаги дорихоналарда сотилгани маълум бўлди”, сарлавҳали материалида хато маълумот берилганини айтди. Лекин айнан хато маълумот қайси эканига аниқлик киритмади.
Адвокатга кўра, материал сарлавҳаси ўқувчини чалғитувчи бўлган.
“Дарё” интернет нашрининг мазкур материалида “Док-1 Макс” сиропи, ишлаб чиқарувчилари томонидан 2021 йилда қайта рўйхатдан ўтказилаётганда GMP сертификатининг муддати ўтган бўлса-да, Ўзбекистондаги дорихоналарда сотилишига рухсат берилгани, айнан ўша даврда сиропнинг таркибида заҳарли моддаси бўлган 39 600 та флакони мамлакатга олиб кирилгани маълум қилинганди.
Мазкур ҳолатни очиқлаган судья нега бундай ҳолат юзага келган дея гувоҳга, Фармасевтика тармоғини ривожлантириш агентлиги собиқ раҳбари С.К.га юзланиб, вазиятга изоҳ сўраганди. Бунга жавоб берган судланувчи, агентликнинг собиқ раҳбари С.К. “ъДок-1 Максънинг 39 600 флакони ишлаб чиқарувчи Marion Биотеч ПВТ. Ltd корхонасининг GMP сертификати бор пайтда ишлаб чиқарилгани учун сертификати муддати тугаган пайтда ҳам Ўзбекистонга олиб кирилишига ҳамда дорихоналарда сотилишига рухсат берилган”, — дея жавоб берганди.
Судга илтимоснома киритган адвокат материалнинг ички қисмида маълумот тўғри берилганини, аммо сарлавҳа ўқувчини чалғитаётганини айтиб, ОАВ вакилига эътироз қилди.
Мазкур илтимосномани кўриб чиққан судлов ҳайъати адвокатнинг эътирози бўйича Олий суд ахборот хизмати ва Тошкент шаҳар судининг ахборот хизмати вакиллари билан маслаҳатлашилганини, уларнинг жавобига кўра, журналист хато қилмаганини айтди.
Бу журналистикада бор тартиб экан, журналистлар ўқувчини ўзига қаратиш, материали кўпроқ ўқилиши учун шундай сарлавҳалардан фойдаланиши мумкин экан. Бу ҳолатда журналист нотўғри қилмаган. Шундай бўлса-да, биз “Дарё” нашри вакили ва барча ОАВ журналистларига мурожаат қилиб, “Док-1 Макс” иши жамоатчилик эътиборидаги масала эканини инобатга олиб, имкон қадар хато қилмасликка чақирамиз. Ва огоҳлантирамиз, — деди судья адвокат илтимосномасига жавоб берар экан.
Изоҳ (0)