“Дарё” репортажи: Намангандаги “Афсоналар водийси” боғида халқаро асал фестивали бошланди

Наманган шаҳридаги “Афсоналар водийси” боғида халқаро асал фестивали бошланди. Бу ҳақда Дарё мухбири Азизбек Абдувалиев хабар бермоқда.

Иккинчи бор ўтказилаётган ушбу фестивалда маҳаллий ва Россия, Қозоғистон, Қирғизистон каби хорижий давлатлардан келган 200 нафардан ортиқ асал етиштирувчилар ўз маҳсулотлари билан иштирок этмоқда.

Очилиш маросимида иштирок этган вилоят ҳокими Шавкат Абдураззақовнинг қайд этишича, Наманган асалари пакетлари экспорти бўйича мамлакатда етакчи ўринда турибди: хорижга чиқарилаётган ушбу маҳсулотларнинг 70 фоизи вилоят ҳиссасига тўғри келмоқда.

“Вилоятда асал етиштириш кўрсаткичлари ҳам йилдан йилга ортиб бормоқда. Ўтган йили 4832 тонна асал етиштирилган бўлса, жорий йил якунига қадар бу кўрсаткич 5617 тоннани ташкил этиши кутилмоқда. Асаларичиликка ихтисослашган маҳаллаларимиз ҳам кўпайиб бораётгани ҳам кишини қувонтиради”, — дейди Шавкат Абдураззоқов.

Маросим меҳмонларидан бири — Ўзбекистон фермер, деҳқон хўжаликлари ва томорқа ер эгалари кенгаши раиси Актам Хайитовнинг таъкидлашича, асаларичилик мамлакатдаги фермер ва томорқа хўжаликларининг етакчи ва яхшигина даромад келтирувчи йўналишларидан бирига айланиб бормоқда.

Уч кун давом этадиган фестиваль давомида асаларичиликни ривожлантириш истиқболларига бағишланган анжуман ва тадбиркорларнинг бизнес-мулоқотлари, дорбозлар, полвонлар ва аскиячилар чиқишлари, концерт дастурлари, миллий либослар кўргазмаси ва палов чемпионати ўтказилиши режалаштирилган.

Шунингдек, фестиваль доирасида имконияти чекланган фуқаролар, кам таъминланган оилалар ҳамда ижтимоий ҳимояга муҳтож хотин-қизларга 1 тонна асал бепул тарқатилиши ҳам кўзда тутилган.