Ҳиндистон—Непал чегарасининг Биҳар штатидаги ҳудудидан ноқонуний тарзда ўтаётганда ўзбекистонлик аёллар қўлга олингани тўғрисида хабар берилганди. Ўзбекистоннинг Деҳлидаги элчихонасига кўра, 14 июль куни ушбу фуқаролар дипломатия миссияси кўмагида ватанга қайтарилган.
Ушбу аёллар 2021 йил октябрда Ҳиндистон—Непал чегарасининг Биҳар штатидаги ҳудуддан ноқонуний тарзда ўтаётганда қўлга олинган. Арария шаҳридаги биринчи инстанция суди 2022 йил августида Ўзбекистон фуқароларини мамлакат ҳудудидан чиқариб юбориш (депортация қилиш) тўғрисида чиқарган қарорига қарамасдан турли бюрократик тўсиқлар ва юрисдикциянинг мураккаблиги сабабли улар 14 июлгача ушлаб турилганди.
Қайд этилишича, ўзбекистонликларни ватанга қайтариш жараёнида элчихона томонидан Ҳиндистон Ташқи ишлар вазирлиги ва Биҳар штатининг тегишли идоралари билан мазкур ҳолат юзасидан расмий мулоқотлар ўтказилган, вазият назоратга олинган ва уларга тегишли консуллик-ҳуқуқий ёрдами кўрсатилган.
Дипломатик миссия Ўзбекистон фуқароларини Ҳиндистонга сафар қилишдан олдин турли шубҳали гуруҳ ёки шахсларнинг ёлғон ваъдаларига алданиб қолмаслик, ушбу мамлакатга кириш ва унда бўлиб туриш чоғида маҳаллий қонунчилик талабларига қатъий риоя қилишга чақиради.
Элчихона бундай ҳолатлар юзага келган тақдирда, зарур консуллик-ҳуқуқий ёрдами кўрсатилиши учун зудлик билан +91 11 2467 0774/75 телефон рақами ёки @consuluzbindia_bot орқали мурожаат қилишни тавсия қилади.
Бир неча кун олдин Россияда қийин аҳволда қолган ўзбекистонликларга ёрдам кўрсатилиб, улар ватанга қайтарилгани тўғрисида хабар берилганди. Ундан олдин эса Россияда устига футбол дарвозаси тушиб кетган ўзбекистонлик эркак ватанга қайтарилган эди.
Изоҳ (0)