Хитой Давлат кенгаши (мамлакатнинг олий ижроия органи) собиқ бош вазири Ли Кецян 68 ёшида вафот этди, деб хабар бермоқда Хитой марказий телевидениеси CCTV.
Xinhua агентлиги аниқлик киритишича, Ли Кецян Шанхайда таътилда бўлган. 26 октябрь куни сиёсатчи юрак хуружига учраган. Шифокорлар уни сақлаб қолишга уринган, бироқ эртаси куни — 27 октябрь маҳаллий вақт билан соат 0:10 да у вафот этди.
Ли Кецян 2013 йил март ойида Хитой Давлат кенгаши бош вазири этиб тайинланган, 2018 йилда эса иккинчи беш йиллик муддатга ҳукумат раҳбари этиб қайта сайланган. 2023 йил март ойида у ўз лавозимини тарк этди — унинг ўрнига ўтган йилнинг кузида у ҳукмрон Коммунистик партия Сиёсий бюроси Доимий қўмитасига қўшилган Ли Сян келди.
Ли Сян номзодини Хитой етакчиси Си Цзиньпин илгари сурган.
BBC ёзишича, истеъфога чиқишидан олдин Ли Кецян Коммунистик партиядаги иккинчи нуфузли шахс бўлган. Ҳукуматга бошчилик қилаётган пайтда у ишсизлик, шаҳар ва қишлоқ аҳолисининг даромадлари фарқи, мамлакатнинг урбанизацияси каби ижтимоий-иқтисодий масалалар комплексини ҳал этишни асосий вазифа деб атаган. Маълумоти бўйича иқтисодчи бўлган Ли Кецян ушбу соҳадаги ислоҳотлар учун масъул эди, шунингдек, COVID-19 пандемияси билан боғлиқ қатъий чекловлар туфайли иқтисодиёт дуч келаётган муаммолар ҳақида огоҳлантирган, деб эслайди CNN.
Bloomberg қайд этишича, Лининг иқтисодий масалаларни ҳал қилишдаги роли сўнгги йилларда пасайган, бунга Си Цзиньпин бундай муаммоларни ўзи ва маслаҳатчиси Лю Хе бошчилигидаги бир қатор партия қўмиталари қўлига ўтказгани сабаб бўлган.
Бош вазир ўринбосари (2008 — 2013) сифатида Ли Кецян иқтисоддан ташқари энергетика, қурилиш ва соғлиқни сақлаш масалаларини ҳам назорат қилган. Сиёсатчи 2007 йилда Коммунистик партия Марказий қўмитаси Сиёсий бюросига киришдан олдин Хенан ва Ляонин провинцияларида турли раҳбарлик лавозимларида ишлаган.
Изоҳ (0)