“Асосли бирон бир ҳужжат маълум эмас”. Шота Руставели кўчасидаги “тарихий уй” бузилаётганига муносабат билдирилди

Яккасарой тумани ҳокимлиги Шота Руставели кўчасидаги “тарихий уй”нинг бузилишига рухсат берилгани айтилган хабарларга муносабат билдирди.

Блогер Никита Макаренко Тошкент шаҳар ҳокимлиги Шота Руставели кўчасидаги 22-сонли тарихий уйни бузишга рухсат бергани ҳақида ёзди. Бино “Океан” дўконининг ўнг томонида жойлашган. Унинг ўрнига янги бино қуриш режалаштирилмоқда.

“Мазкур уй маданий мерос рўйхатига киритилмаган, аммо мутахассислар ҳукуматдан бир неча бор Руставели кўчасидаги бутун ансамблни, хусусан, ушбу уйни ҳам рўйхатга киритишни талаб қилган”, — деб ёзади блогер.

 Макаренконинг қайд этишича, ҳозирга қадар ушбу даврда қурилган уйлардан бирортаси бузилмаган.

Яккасарой туман ҳокимлигининг маълум қилишича, юқоридаги ҳолат бўйича Яккасарой туман ҳокимлигига асосли бирон бир ҳужжат маълум эмас.

“Юқоридаги манзилда ҳеч қанақа бузилиш ишлари олиб борилмаётганини маълум қиламиз”, — дейилади муносабатда.

Аввалроқ Тошкентнинг Ҳамид Олимжон майдонидаги “Москва” уйлари номи билан машҳур бўлган кўп қаватли уйлар реконструкция қилиниши мумкинлиги тўғрисида хабар берилганди. Мазкур уйда яшовчилар бир кун аввал ҳокимлик вакиллари тақдим этган биноларни реконструкция қилиш эскизларини жўнатган.