Тошкент шаҳрида ноқонуний қурилган бино-иншоотларни бузиш бошланди. Бу ҳақда пойтахт ҳокимлиги ахборот хизмати хабар берди.
Қайд этилишича, шаҳар ҳокимлиги ва тегишли хизматларнинг рухсатисиз, йўллар бўйлаб қурилган бинолар аҳоли учун хавф туғдиради, яъни уларда автотураргоҳ ва тўхташ йўли йўқ, бу эса ҳайдовчининг бир дақиқалик хариди орқасидан бошқа ҳайдовчилар ва пиёдалар учун сезиларли ноқулайлик ва хавфга сабаб бўлади.
Ҳозирги кунда Тошкентда тегишли таҳлиллар ўтказилиб, ихтисослаштирилган хизматлар томонидан ноқонуний бино ва иншоотларни демонтаж қилиш ишлари бошланди. Шу билан бирга, ушбу бинолардан фойдаланган тадбиркорларга қонуний асосда ўз фаолиятини давом эттириш учун шароит яратилади.
Ўз навбатида, Тошкент шаҳри ҳудудида маиший ва тижорат биноларига эга бўлган пойтахт аҳолиси ҳужжатларнинг шаҳарсозлик меъёрларига мувофиқлигини яна бир бор синчиклаб текширишга чақирилган.
“Шунингдек, ушбу турдаги мулкни сотиб олаётганда эҳтиёт бўлишингизни ва юридик хизмат компаниялари билан маслаҳатлашишингизни сўраймиз. Тошкент шаҳар кадастр хизматлари томонидан бериладиган ҳужжатлардан ташқари, бино ва иншоотлар учун ҳужжатларнинг муқобил турлари мавжуд эмас.
Потенциал хариднинг барча тафсилотларини аниқлаштириш учун ваколатли органларга шахсан ёки онлайн давлат хизматлари орқали мурожаат қилинг.
Ҳурматли пойтахт аҳолиси! Фақат ишончли ва расмий маълумот манбаларига ишонинг, аниқ маълумот олиш учун шаҳар ҳокимлиги матбуот хизматига 71 210-01-63 телефон рақами ёки ижтимоий тармоқлар орқали мурожаат қилинг”, — дейилади хабарда.
Изоҳ (0)