Қурилиш ва уй-жой коммунал хўжалиги вазирлиги ижтимоий тармоқларда тарқалган “Дўстлик” (“Бобур”) боғидаги ҳолатга муносабат билдирди.
Блогер Никита Макаренко ўзининг Telegram каналига “Дўстлик” боғининг сиэтл қисми ҳудуди Venera Towers қурилиш ташкилоти томонидан ўзбошимчалик билан эгаллаб олинаётгани ҳақида ёзди. Қурилиш ва уй-жой коммунал хўжалиги вазирлиги тезкор гуруҳи мазкур ҳолатни ўрганиш учун айтилган манзилга етиб борган. Масалани холис ва шаффоф ўрганиш мақсадида вазиятга масъуллар — боғ маъмуриятидан вакиллар, Тошкент шаҳар қурилиш бош бошқармаси мутахассислари жалб этилган.
Пойтахт қурилиш бош бошқармаси бошлиғи ўринбосари Шавкат Дўстмуҳаммедовга кўра, блогер тасвирда кўрсатган қизил чизиқ нотўғри кўрсатилган. У ердаги ҳимоя панжаралари олдиндан мавжуд бўлган ва бу боғ маъмурияти билан келишилган.
“Ижтимоий тармоқларда акс этган боғнинг чегара ҳудуди билан боғлиқ суратлар асосга эга эмас”, — дейилади хабарда.
Яккасарой тумани Братислава 2А уй манзилида жойлашган “Сиэтл” қаҳвахонаси биносининг бизнес-марказ ва меҳмонхона сифатида ихтисослаштирилиб, реконструкция қилинишида ҳам қоидабузарлик ҳолатлари аниқланмаган.
“Ёғингарчилик сабаб ўпирилиш юз бергани учун муҳофаза девори суриб қўйилди”, — дейди “Дўстлик” боғи раҳбари Ирода Юсупова. Унинг сўзларига кўра, Кадастр агентлиги мутахассислари қурилишдаги котлован ўз ҳудудидан чиқмаганини аниқлаган, муҳофаза қилиб ўралган ҳудуд бўйича эса шартнома ҳужжатлари расмийлаштирилган.
“Боғ 12,3 гектар бўлса, шундоқлигича қолган. Биздан бир сантиметр ҳам қурувчиларга ўтиб кетмайди”, — дея таъкидлайди Юсупова.
Объект техник назоратчисининг айтишича, пойдевор кўтарилиб олинганидан кейин ёғингарчилик ўпирган тупроқлар яна жойига қўйилади.
Май охирларида бош вазир ва Тошкент шаҳар ҳокими вазифасини бажарувчи Шавкат Умурзоқов пойтахт марказида жойлашган биноларнинг 1-қаватидаги кафе ва дўконларни бузиш бўйича кўрсатма бергани рад этилганди. Шунингдек, Тошкентда 3 қават қилиб қурилиши керак бўлган бино 12 қават қилиб қурилгани аниқланган эди.
Изоҳ (0)