Misrdan gepatit C ga qarshi dori vositalarining o‘n beshinchi partiyasi O‘zbekistonga yetkazildi, deb xabar bermoqda “Dunyo” AA.
Ma’lum qilinishicha, 23-sentyabr kuni Uzbekistan Airways Misr hukumati tomonidan mamlakatimizga insonparvarlik yordam sifatida ajratilgan 6240 dona “Sofosbuvir-400mg” dori vositasining o‘n beshinchi turkumini Sharm ash-Shayxdan Toshkentga yetkazib berdi.
Ushbu dori vositalari Sog‘liqni saqlash vazirligi huzuridagi Virusologiya ilmiy-tekshirish instituti tomonidan shifotalab bemorlar o‘rtasida taqsimlanadi.
Xabarda aytilishicha, Misr sog‘liqni saqlash vaziri 2023-yil fevral oyida Qohiraga oliy darajadagi tashrif doirasida O‘zbekiston SSV bilan imzolangan hamkorlik memorandumi ijrosi va o‘zaro manfaatli loyihalarni amalga oshirish istiqbollarini muhokama qilish, shuningdek, C gepatitiga qarshi kurashda o‘zaro hamkorlikni yanada kengaytirish uchun amaliy safar bilan Toshkentga kelmoqchi.
Misr gepatit B va C viruslariga qarshi kurashda dunyo miqyosida sezilarli muvaffaqiyatlarga erishgan davlatdir. Misr Sog‘liqni saqlash vazirligi ma’lumotlariga ko‘ra, mamlakat aholisi ushbu kasallikdan butunlay forig‘ etilgan bo‘lib, Misr olimlari yaratilgan maxsus diagnostika apparatlari va orttirilgan tajribani o‘zbek mutaxassislari bilan baham ko‘rishga tayyor.
Ushbu dori vositalarini yetkazib berish 29-aprel kuni boshlangandi. 19-avgust kuni dorilarning 14-partiyasi yetkazib berildi.
Izoh (0)