Қозоғистон Россиянинг Украинага бостириб кириши муносабати билан Ғарб давлатлари Россияга нисбатан жорий этган санкцияларга амал қилади. Бу ҳақда Қозоғистон президенти Қосим-Жўмарт Тўқаев Берлинда Германия канцлери Олаф Шольц билан музокарадан сўнг маълум қилди.
“Қозоғистон (Россияга нисбатан) санкция режимига амал қилишини аниқ қилиб билдирган. Унинг бажарилиши юзасидан тегишли ташкилотлар билан алоқаларимиз бор Германия томонида санкциялар режимини четлаб ўтишга қаратилган эҳтимолий ҳаракатлар юзасидан хавотир бўлмаслиги керак, деб ўйлайман”, — дея таъкидлади Қозоғистон раҳбари.
Тўқаев, шунингдек, Қозоғистон Россия ва Украина ўртасидаги “ҳарбий ҳаракатларни зудлик билан тўхтатиш” ва “БМТ Низоми асосида тинчлик музокаралари тарафдори” эканини билдирди.
“Бугун мен муҳтарам жаноб канцлерга вазият жуда жиддий эканини айтдим. Украина ҳам, Россия томони ҳам музокараларга тайёр эканлигини даъво қилмоқда, бироқ музокаралар платформаси ҳали аниқ эмас”, — деди у.
Тўқаевнинг сўзларига кўра, Россия билан узоқ чегарага эга Қозоғистон РФ унинг ҳудудий яхлитлигига таҳдид солишидан қўрқмайди.
“(Россия ва Қозоғистон ўртасидаги) чегара бир вақтлар делимитация қилинган ва салмоқли даражада демаркация қилинган, икки давлат парламентлари томонидан тасдиқланган ва ратификация қилинган, шунинг учун биз Россия томонидан ҳудудий даъволар бўлишидан хавотирда эмасмиз. Биз икки томонлама асосда мунтазам, дўстона алоқаларни давом эттирамиз”, — деди у.
Қозоғистон президенти унинг мамлакати Ғарб санкцияларига амал қилаётганини биринчи марта айтаётгани йўқ. Июнь ойида Тўқаев оммавий ахборот воситаларида Қозоғистон орқали Россияга икки мақсадли маҳсулотлар экспорт қилиниши ҳақидаги хабарлар “мутлақо ёлғон” эканини айтганди. Бунгача Қозоғистон Молия вазирлиги Россия бозорига электрон бутловчи қисмлар импортининг “оралиқ манзили” деб аталган юқори даражадаги суриштирув натижалари эълон қилинганидан кейин Россияга маҳсулотлар экспорти устидан назоратни кучайтиришга ваъда берган эди.
Европа Иттифоқи бир неча ойлардан бери Россияни ўзига қарши ўрнатилган савдо чекловларини четлаб ўтиш имкониятидан маҳрум қилишга уриниб келмоқда. Ёзда Европа Иттифоқи санкция остидаги товарларнинг Россияга киришига хисса қўшаётган учинчи давлатларга нисбатан санкциялар жорий этиш имконини берувчи механизмни тасдиқлади.
Изоҳ (0)