АҚШ Давлат департаменти амалдори Жош Пол АҚШнинг Исроилга ҳарбий ёрдам ўтказиш ҳақидаги қарорига рози бўлмагани учун истеъфога чиқди. Бу ҳақда Тhе Washington Post нашри хабар берди.
Жош Пол қурол етказиб бериш билан шуғулланувчи Сиёсий-ҳарбий ишлар бюросида АҚШ Конгресси ва жамоатчилик билан алоқалар бўйича директор эди. У ушбу лавозимда 11 йилдан ортиқ ишлаб келаётганди.
Пол президент Жо Байден маъмуриятининг Исроилга ҳарбий ёрдам ўтказиш қарорини “импулсив реакция” деб атади. АҚШ расмийси фаластинлик тинч аҳолининг ўлимига ҳисса қўшаётган ишни давом эттира олмаслигини айтди.
“Мен Исроил ҳукуматининг (ҲАМАСга) жавоб қайтариш ва ўзини ҳимоя қилиш ҳуқуқини тан оламан. Аммо бу жараёнда қанча фаластинлик болалар ҳалок бўлиши мумкинлиги савол остида”, — дейди Пол.
Мулозимнинг сўзларига кўра, у истеъфога чиқишини эълон қилиб, сабабларини тушунтирганидан сўнг уни Давлат департаментидаги кўплаб ҳамкасблари қўллаб-қувватлаган
АҚШ Давлат департаменти изоҳ беришдан бош тортди. WSJ таъкидлаганидек, Полнинг истеъфоси Байден маъмуриятининг Исроилни қўллаб-қувватлашига камдан кам норозилик намунасидир.
Исроил ҲАМАС ҳужумининг эртасига, 8 октябрь куни АҚШдан қўшимча ҳарбий ёрдам сўраганди. Шу куни Пентагон Исроил армиясини қўшимча техника ва ресурслар, жумладан, ўқ-дорилар билан таъминлашини маълум қилди. Бундан ташқари, Қўшма Штатлар шарқий Ўрта Ер денгизига авиаташувчи кема жўнатиб, минтақада F-35, F-15, F-16 қирувчи ва А-10 ҳужумчи самолётларидан иборат эскадронларни кучайтирди.
Изоҳ (0)