АҚШ Европа Иттифоқидан Ўзбекистон фуқаролари учун виза назоратини кучайтиришни талаб қилди – Bloomberg

АҚШ президенти маъмурияти Европа Иттифоқи ва унга аъзо давлатларни Марказий Осиёнинг айрим мамлакатларидан келган саёҳатчиларга нисбатан кескин чоралар кўриш ҳақида огоҳлантирди. Бундан мақсад — эҳтимолий террорчиларнинг Қўшма Штатларга киришига йўл қўймаслик, деб ёзмоқда Bloomberg. 

Сўровлар аввалроқ, бир гуруҳ мигрантларнинг ИШИДга алоқадор контрабандачи ёрдамида АҚШ жануби-ғарбий чегарасидан ўтгани билан боғлиқ. Бу Европа аэропортлари орқали транзит ўтаётган йўловчиларнинг Қўшма Штатларга ноқонуний йўллар билан киришга уринишлари билан боғлиқ хавотирларни кучайтирган. 

АҚШ расмийлари Европа Иттифоқидан Ўзбекистон ва Тожикистон фуқаролари учун аэропортларда транзит визаси талаб қилинишини истамоқда. Транзит визаси — бу мамлакат ҳудуди орқали транзит саёҳат қилиш (ўтиш) учун зарур бўлган муддатга, чипталарга мувофиқ ва кўпи билан уч кун (72 соат) муддатга ўтиш пунктида тўхташ ҳуқуқи билан бериладиган виза. 

Оқ уй расмийлари Bloomberg нашрининг бу борадаги сўровига жавоб бермаган.

Август ойида ФҚБ Қўшма Штатларнинг жанубий чегарасида бошпана сўраган Ўзбекистон ва бошқа мамлакатлардан келган ўндан ортиқ мигрантлар устидан тергов бошлагани хабар қилинганди. Расмийлар мигрантларнинг ИШИДга алоқадор контрабандачи ёрдамида чегарадан ўтганини аниқлаган. 

Бу ҳақдаги шошилинч махфий разведка ҳисоботи АҚШ президенти Жо Байден кабинетидаги юқори мансабдор шахсларга юборилган. Бироқ ФҚБ ҳеч қандай террорчилик режасини аниқламаган.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.