Тошкентдаги Central Asian University университетида (собиқ Akfa университети) икки йиллик тайёргарлик курсларини тамомлаб, дарҳол иккинчи курсга ўқишга қабул қилинган талабалар билан боғлиқ можаро юз берди.
Икки йил аввал Akfa университетига ўқишга кирган талабалар ҳам бу борада “Дарё”га мурожаат йўллади. Билдирилишича, улар эрталабдан туш вақтигача мактабда 10—11-синфда, кечгача эса университетда ўқиди. Келишувга кўра, икки йил ўқишни тугатиб, имтиҳонлардан ўтишганидан сўнг, уларни университетнинг 2-курсига қабул қилишлари керак эди. Ўтган муддат ичида Akfa университети Central Asian University’га айланди, раҳбарият ҳам ўзгарди.
“Эндиликда янги университет раҳбарияти 1-курсдан бошлаб ўқийсизлар деяпти. 2 йил давомида тўлаган пулимиз ҳам қайтарилмас экан. Қизиқ жиҳати, икки йил давомида ўқиган фанларимизни қайта ўқир эканмиз”, — дейди мурожаат қилган ўқувчилардан бири.
“Газета.уз”нинг ёзишича, университетда 10—11-синф ўқувчиларига мўлжалланган Akfa University Part-Time Student курслари бўлган. Пайшанба куни ушбу курсларни тамомлаб, бу йил иккинчи курсда ўқишни бошлаган талабалар дарсларга қўйилмаган. Ота-оналар курслар учун 40 миллион сўм (йилига 20 миллион сўмдан) тўлаганларини, шунингдек, шартнома имзолаб, ўқув йили боши учун шартнома суммасининг бир қисмини тўлаб қўйганини маълум қилган.
Central Asian University баёноти
Ҳолат юзасидан университет расмий баёноти эълон қилинди. Унда айтилишича, икки йил муқаддам Akfa университетининг собиқ ректори Бекзод Жалилов томонидан таъсисчисидан яширин ҳолда фирибгарлик йўли билан ўзига қўшимча маблағ ишлаш мақсадида Study for the success МЧЖ ташкил этилган. Амалдаги қонунларга хилоф йўл билан ушбу компания номидан ота-оналар билан шартномалар тузган.
“Шартномага мувофиқ ота-оналарга уларнинг фарзандлари мактабнинг 10—11-синфларида ўқиш билан бир вақтнинг ўзида Akfa университетининг 1-босқичини ўқиб тугатиши ва мактабни битириши биланоқ университетнинг 2-босқичига қабул қилиниши МЧЖ томонидан ваъда қилинган ва ота-оналар ушбу хизмат эвазига МЧЖ ҳисоб рақамига муайян тўловларни қилишган”, — дейилади баёнотда.
Қайд этилишича, Central Asian University МЧЖнинг банк ҳисоб рақами “Ўзмиллийбанк” АЖ Яшнобод филиалида очилган. Study for the success МЧЖнинг банк ҳисоб рақами эса Тошкент шаҳар Kapitalbank амалиёт бошқармасида очилган. Шунингдек, МЧЖнинг ҳисоб рақамига тушган пул маблағлари Бекзод Жалиловнинг турмуш ўртоғига тегишли бўлган МЧЖ томонидан ўзлаштириб юборилган.
“Бироқ ушбу МЧЖнинг Akfa университетига ҳеч қандай алоқаси йўқ. Ўқувчиларни мактабда ўқиб турган вақтида университет дастурларига қабул қилиш ҳам қонунчиликка зид. МЧЖ таъсис ҳужжатидан кўриниб турибдики, у собиқ ректорнинг яқин қариндоши томонидан таъсис этилган, контакт маълумотлари ҳам унга тегишли, ўзини банкларнинг бирида алоҳида ҳисоб рақамлари мавжуд”, — дейилади баёнотда.
Таъкидланишича, ушбу иш юзасидан ҳуқуқни муҳофаза қилувчи органлар, хусусан туман прокуратураси томонидан жиноий иш қўзғатилган бўлиб, жабрланувчилар туман прокуратурасига тегишли шикоят билан мурожаат қилишлари мумкинлиги маълум қилинган.
Шунингдек, Бекзод Жалиловнинг қонунга хилоф хатти-ҳаракатларидан жабрланган ва қўлида шаҳодатномалари (11-синф) бор болаларни тез кунларда, ўрнатилган тартибда университетнинг 1-босқичига қўшимча қабул қилишини ота-оналарга маълум қилган.