Rossiyaning Ijevsk shahridagi maktabda yuz bergan otishma oqibatida halok bo‘lganlar soni 17 kishiga yetdi, shularning 11 nafari — bolalar. Bu haqda Udmurtiya ma’muriyati Tergov qo‘mitasi ma’lumotlariga tayanib xabar bergan.
Yaralangan o‘quvchi bolalar yotqizilgan kasalxona bosh shifokori Aleksandr Shaklein ma’lum qilishicha, 16 boladan to‘qqiz nafari reanimatsiyada yotibdi. Yana ikki nafar katta yoshli jabrlanuvchilar ham reanimatsiyada.
Rossiya tarkibiga kiruvchi Udmurtiya respublikasi poytaxti Ijevsk shahrida joylashgan 88-maktabda 26-sentabr kuni ertalab otishma sodir etildi. Bir erkak maktab binosiga kirib olib, ikki qo‘riqchini o‘ldirdi, so‘ng o‘qituvchi va o‘quvchilarga qarata o‘t ochdi. Oxir-oqibat o‘z joniga qasd qildi.
Hujum qilgan shaxs shu maktabni bitirib ketgan mahalliy fuqaro, 1988-yilda tug‘ilgan Artyom Kazansev bo‘lib chiqdi. Uning yonidan jangovar o‘qlar bilan otishga moslashtirilgan ikkita travmatik to‘pponcha topildi. U o‘n yildan buyon “shizofreniya” tashxisi bilan psixonevrologik dispanserda hisobda turgan.
Holat yuzasidan jinoyat ishlari qo‘zg‘atildi.
Kreml voqeani terakt deb atadi. Udmurtiyada halok bo‘lganlar xotirasiga 29-sentabrga qadar motam e’lon qilindi.
Rossiya maktablarida otishma uyushtirilishi bilan bog‘liq voqealarning eng yiriklaridan biri 2021-yilda Qozonda yuz bergandi.
2021-yil 11-mayda 19 yoshli Ilnaz Galyaviyev o‘zi bitirib ketgan 175-maktabga qonli hujum uyushtirdi. Yigit qurol olib yurish ruxsatnomasiga ega bo‘lgan, maktab hududiga o‘q-dorilar zaxirasi bilan kirib kelgan. Otishma oqibatida to‘qqiz nafar odam halok bo‘ldi, 23 kishi jarohatlandi, yaralanganlarning aksar qismi bolalar edi. Maktabga politsiyachilar yetib kelganidan keyin Galyaviyev taslim bo‘ldi va uni hibsga olishdi. Mergan qilgan qonli jinoyati uchun qamaldi.
Izoh (0)