Туркия Фаластин учун кафил бўлишга тайёрлигини билдирди

Туркия Исроил билан тинчлик келишувига эришишда Фаластин учун кафил давлат ролини ўйнашга тайёр. Бу ҳақда Туркия Ташқи ишлар вазирлиги раҳбари Хоқон Фидан маълум қилди, деб хабар бермоқда Star нашри.

“Бошқа давлатлар ҳам Исроил учун кафил бўлиши керак. Иккала томон тегишли тинчлик келишувига эришгач, кафил давлатлар келишув талабларининг бажарилиши учун жавобгарликни ўз зиммасига олиши зарур”, — деди вазир.

Фиданнинг сўзларига кўра, “узоқ муддатли тинчлик”ка эришишнинг ягона йўли шу. Акс ҳолда, агар кафолатлар бўлмаса, Исроил ва минтақа аҳолиси “ҳеч қачон ўзини хавфсиз ҳис қилмайди”, оқибатда “бошқалардан хавфсираб, уларни таъқиб қилишда” давом этади.

“Ушбу доирада узлуксиз айланиш давом этади”, — деб хулоса қилди туркиялик вазир.

Аввалроқ Россия президенти Владимир Путин Исроил ва Фаластин ўртасидаги зиддиятни мустақил Фаластин давлатини яратиш йўли билан ҳал қилиш кераклигини айтганди.

Хитой ташқи ишлар вазирлиги ҳам шунга ўхшаш позицияни билдирган.