АҚШ ва Исроил Ғазога гуманитар ёрдам етказиш режасини ишлаб чиқишга келишиб олди. Бу ҳақда АҚШ Давлат котиби Энтони Блинкен ва Исроил бош вазири Биньямин Нетаньяху ўртасида 17 октябрь куни эрталаб якунланган музокаралардан сўнг маълум қилинди. Reuters хабарига кўра, музокаралар тўққиз соат давом этган. Учрашув ҳаво тревогаси янграганидан кейин тўхтатилиб, Блинкен ва Нетаняху қисқа муддатга бункерга тушишга мажбур бўлган. CNN музокаралар етти ярим соат давом этганини ёзди.
“Биз Исроил билан ҲАМАС Ғазога келтириладиган ёрдамни тўхтатиб қўйиши ёки йўқ қилиши, ёрдамнинг муҳтож одамларга етиб боришига тўсқинлик қилиши мумкинлигидан хавотирдамиз. Агар ҲАМАС тинч аҳолига гуманитар ёрдам етказилишига қандайдир тарзда тўсқинлик қилса, жумладан, уни олиб қўйса, энг аввал биз уни қоралаймиз ва бу қайта такрорланмаслиги учун чора кўрамиз”, — деди Блинкен.
АҚШ президенти Жо Байден 18 октябрь куни Исроилга ташриф буюради. Бу ҳақда дастлаб Блинкен, сўнг Байденнинг ўзи Х (собиқ Twitter) ижтимоий тармоғида маълум қилди. Америка президентининг сўзларига кўра, у “ҲАМАСнинг шафқатсиз терроридан” жабр кўрган мамлакатга “бирдамлик изҳор қилмоқчи”.
Исроилдан кейин Байден “гуманитар масалалар”ни ҳал қилиш учун Иорданияга боради ва у ерда қирол Абдулла II, Миср президенти Абдул Фатоҳ ас-Сисий ҳамда Фаластин маъмурияти раҳбари Маҳмуд Аббос билан учрашади.
Ғазо секторини назорат қилаётган ҲАМАС 7 октябрь куни эрталаб Исроилга ҳужум қилди. Улар мамлакатга минглаб ракеталарни отиб, сўнг чегара ҳудудларига кириб келди. Исроил мудофаа кучлари бунга жавобан Ғазо секторига катта зарбалар берди. Исроил расмийлари мамлакат уруш ҳолатида эканлигини расман эълон қилди.
АҚШ Мудофаа вазирлиги Жералд Форд ва Дуайт Эйзенхауэр вазиятни кузатиш учун Ўрта Ер денгизининг шарқий қисмига иккита авиаташувчи бошчилигида зарба берувчи гуруҳ юборди. The Wall Street Journal нашрига кўра, Пентагон Исроилга юбориш учун 2000 га яқин аскарни саралаб олган.
Изоҳ (0)