Ғазо секторини назорат қилаётган ҲАМАС гуруҳининг ҳаракатлари ва сиёсати Фаластин халқи манфаатларини акс эттирмайди, деди Фаластин миллий маъмурияти раҳбари Маҳмуд Аббос Венесуэла раҳбари Николас Мадуро билан телефон орқали мулоқоти чоғида. Сиёсатчилар ўртасидаги суҳбатдан парчалар 16 октябрь, душанба куни Фаластиннинг WAFA ахборот агентлиги томонидан эълон қилинди.
Аббос ҳам фаластинликлар, ҳам исроилликлар ўртасида тинч аҳолининг ўлдирилишига қарши эканини билдирди, шунингдек, “ҳар икки томондан тинч аҳоли, асирлар ва қўлга олинганларни” озод қилишга чақирди, деб ёзади WAFA. Икки давлат раҳбарларининг суҳбатига кўра, Фаластин—Исроил можароси сиёсий ечим билан якунланиши керак, бунга эса зўравонликларсиз эришилади.
Фаластин раҳбари, шунингдек, “халқи Ғазо секторидан кўчирилишини бутунлай рад этиши”ни таъкидлаб, бу “фаластинликлар учун иккинчи Накба” (фаластинлик арабларнинг 1947—1949 йиллардаги араб-исроил уруши натижасида оммавий кўчиши) бўлишини таъкидлади.
“Ғазо секторида гуманитар йўлаклар очилиши, аҳоли сув ва дори-дармон билан таъминланиши керак”, — деди Аббос.
Исроил Ғазо сектори жанубига сув таъминотини тиклади
Исроил энергетика вазири Israel Кац 15 октябрь куни мамлакат расмийлари АҚШ президенти Жо Байден билан музокаралардан сўнг Ғазо сектори жанубида аҳолини эвакуация қилишга ёрдам берадиган сув таъминотини тиклашга келишиб олганини айтди.
Аввалроқ Исроил мудофаа кучлари Ғазо секторида қуруқликда кенг кўламли операция ўтказишга тайёрланаётганини тасдиқлаган. Уларнинг баёнотига кўра, бу ҳаракатлар фақат Ғазо сектори шимолидан тинч аҳолини жанубга эвакуация қилиш зарурати туфайли кечиктирилмоқда.
Байден фаластинликларнинг ўз тақдирини ўзи белгилаш ҳуқуқини қўллаб-қувватлади, аммо ҲАМАС иштирокисиз
“Яқин Шарқдаги можарони тинч йўл билан ҳал қилишга ҳали имкон бор. Фаластин халқи ўз ҳокимиятига эга чиқиши, Фаластин давлатига йўл очилиши керак, аммо можаро янги босқичда кескинлашгани ҳисобга олинса, ҳозир бу ечимга эришиш имконсиз”, — деди АҚШ президенти Жо Байден.
Шу билан бирга, Америка етакчисининг таъкидлашича, ҲАМАС фаластинликларнинг манфаатларини ифодаламайди, Исроил ҳам “Фаластин халқининг муҳим қисми ҲАМАС позициясига қўшилмаслигини” тушунаётган бўлиши мумкин. Байденнинг фикрича, ҲАМАС “бутунлай йўқ қилиниши” керак ва Исроил буни амалга оширишга ҳақли.
Изоҳ (0)