Грузия Конституциявий суди мамлакат президенти Саломе Зурабишвилига нисбатан импичмент жараёнини бошлаш ҳақида қарор қабул қилди.
“Конституциявий суд Грузия президенти Саломе Зурабишвили томонидан Конституция бузилганини аниқлади”, — дейилади баёнотда.
Хусусан, суд Грузия президентининг 2023 йил 31 август, 1 сентябрь ва 6 сентябрь кунлари хорижга амалий ташрифлари чоғида Грузия ҳукумати розилигисиз халқаро муносабатлар соҳасида вакиллик функцияларини амалга оширгани ва шу орқали Грузия Конституциясининг 52-моддасини бузганини таъкидлади.
Қарорни тўққиз нафар судьядан олти нафари қўллаб-қувватлади.
Энди импичмент жараёни парламентда овозга қўйилади. Овоз бериш икки ҳафта ичида ўтказилиши керак.
Конституциявий суд қарорига жавобан Саломе Зурабишвили истеъфога чиқиш ниятида эмаслигини айтди.
“Мен ҳеч қаерга кетмайман. Ўз жойимда қоламан, бутун умримни бағишлаган ва шунинг учун (Франциядан) келган ўрнимда қоламан, мамлакатимизнинг Европага хос келажаги ва демократия учун курашаман”, — деди президент.
Бундан олдин ҳукмрон “Грузия орзуси” партияси етакчиси Ираклий Кохабидзе Конституциявий суд қароридан сўнг Зурабишвилининг ўзи истеъфога чиқиши кераклигини айтганди.
“Бугун Европа келажаги ва демократияси бир ўқ билан ўлдирилди. Ҳокимият тармоқлари ўртасида мувозанат бўлмаган мамлакатни демократик деб бўлмайди”, — деб жавоб берди Грузия раҳбари.
Изоҳ (0)