Актрисанинг ҳинд фильмидаги ўзи ўйнаган бош роли шахсий ҳаётига жуда ўхшайди: ота-оналар томонидан олдиндан келишилган никоҳ, бунга қарама-қарши муҳаббат, севган инсони учун узоқ давом этган курашлар, якунида эса унга турмушга чиқиш бахти. Қандай қилиб Ҳема Малини жамият қонунларига зид борди ва барибир бахтли бўлишга муваффақ бўлди?
Бирор ким бу ҳақда очиқдан-очиқ гапирмаса ҳам, ҳинд жамияти ҳамон каста қонунлари асосида яшайди. Бу ерда ҳар бир кишига келиб чиқишига қараб маълум рол берилади. Гап кино сингари янги соҳаларга тегишли бўлса ҳам.
Болливудда карьера қилиш учун гўзал ташқи кўриниш ва истеъдоднинг ўзи етарли эмас, бўлажак актриса ҳинд жамиятининг энг юқори кастаси — брахманлардан бўлиши керак. Ва бу борада Ҳемамалини Раманужам Чакраварти (актрисанинг тўлиқ исми) чиндан ҳам омадли. У 1948 йилда Тамилнад штатида пулдор ва бой актёрлар оиласида туғилган. Онаси — таниқли кино продюсери, ҳинд кинематографиясининг илк тамал тоши қўйилган пайтлардаёқ машҳурликка эришган эди. Ҳеманинг ота-онаси унинг болалигиданоқ қизининг яхши таълим олиши ва кўп қиррали бўлиши учун ҳеч нимани аямади.
Қиз вокал ва хореография билан шуғулланиб, кўп вақтини классик ҳинд рақсини ўрганишга бағишлайди. Онаси билан биргаликда кунига бир неча соат суратга олиш майдончасида саҳна картинаси қандай тайёрланади, чироқлар ва рақслар кетма-кетликлари қай тартибда суратга олинишларни томоша қилди. Ҳинд киносининг асоси — бу бир эпизодни керак бўлса ўн марталаб суратга олишдир. Ҳема ўз кўзлари билан машҳур актёрлар мухлислари томонидан қандай эъзозланишини, том маънода қўлларида кўтариб юришганини кўрди ва бундай эҳтиромни у ҳам хоҳлаган.
Малини 17 ёшга тўлганида «Панда бу дунёни тарк этади» фильмида раққоса сифатида дебют рол ижро этди. Биринчи рол ёш актрисага у қадар катта шон-шуҳрат келтирмаган бўлса-да, раққосалик истеъдоди дарҳол томошабин назарига тушди. Айтиш керакки, фильм телугу тилида суратга олингани боис у кенг миқёсда оммалашмаган.
«Мен ёш эдим ва барча ёшлар сингари ўзимга жуда ишонардим. Мен сизнинг экранда пайдо бўлишингиз сизни аллақачон машҳур қилади, деб ўйлардим. Аммо бу содир бўлмади. Яна бир нечта эпизодларда рол ижро этдим, режиссёрлар елкамга қоқиб «баракалла» дейишди лекин бош ролларга таклиф қилишмади», — дейди Ҳема Малини кейинчалик берган интервьюсида.Сўнг ёш актриса маҳаллий кинокомпанияда бош роллар узоқ кутилишини тушунди ва Болливудни забт этишга қарор қилди. Ҳема зудлик билан Мумбайда машҳур бўлган рақсларни ўзлаштириш учун маҳаллий рақс студиясига ёзилди ва онасинг эслатмаси билан маҳаллий телевизион студия дирекциясида пайдо бўлди. Ота-онасининг ҳомийлиги унга жуда қўл келди, ёш актрисага «Орзулар сотувчиси» фильми учун кичик рол таклиф қилинди.
Болливуддаги биринчи рол ва унинг ортидан келган улкан муваффақият. Ҳемага кетма-кет янги рол таклифлари туша бошлади. 1969 йилда у бир вақтнинг ўзида тўртта фильмда рол ижро этади. «Орзудаги қиз» фильми тўпламида у актёр Дҳарам Сингх Деол (тахаллуси Дҳармендра) билан учрашди. Дҳарам ундан 13 ёш катта, уйланган ва тўрт фарзанднинг отаси эди. Биринчи ижодий ҳамкорликдан сўнг улар орасида учқун пайдо бўлди, бироқ Ҳема бу инсонга бўлган ошиқлик фикрини ўзидан узоқлаштирди. Бундан ташқари, унинг ота-онаси аллақачон унга куёв сифатида ҳамкасби актёр Санджив Кумарни танлаб бўлишган эди. Жуфтлик аллақачон унашувлари ҳақида эълон қилишган, аммо улар тўйни кутишга қарор қилишганди. Гап шундаки, Малинининг кино карьераси энг гуллаб-яшнаган, ўзи учун ном қозонишга улгуриш керак, Болливуд кинематографиясида актрисанинг ёши эса чекланган. Актрисалар фақат 25 ёшгача гўзаллар ролларида ўйнаши мумкин, бу ёшдан сўнг уларга фақат холалар ва оналар ролини таклиф қила бошлайдилар.
20 ёшда турмуш қуриш тезда фарзанд кўришни англатарди ва бу карьерага бағишланиши мумкин бўлган вақтни йўқотиш демакдир. Кумар Ҳеманинг қарорига рози бўлди. Кейинчалик у нотўғри қарор қабул қилганини тушуниб етади.
Шу билан бирга, «Зита ва Гита» картинаси тўпламида Ҳема Малини турмуш қурган Дҳармендра билан яна учрашди. Актриса эгизак опа-сингиллар ролини ўйнади — ташқи кўриниши ўхшаш, аммо темпераментда бутунлай қарама-қарши. Ушбу асарда Малинининг ноёб истеъдоди тўлиқ намоён бўлди, бу унга шон-шуҳрат келтирди.
Актриса бутун фаолияти давомида Дҳармендра билан ўнлаб фильмларда рол ўйнади, уларнинг аксарияти совет томошабинлари томонидан шу қадар севиб томоша қилинганки, уларнинг намойишлари пайтида кинотеатрлар ниҳоятда гавжум эди. «Севимли Рожа», «Зита ва Гита», «Ўрмон қироли» — СССРда, айниқса, машҳур бўлган.
Малини ва Дҳармендра биргаликда қанча кўп ишлашган бўлса, улар бир-бирларини яхши кўришларини шунчалик кўп англадилар. Улар бир-бирига кучли ришталар билан боғландилар. Хема Сандживга унаштирувни бузаётганини маълум қилди, аммо Дҳармендранинг рафиқаси ажрашишдан бош тортди. Суд унинг ёнини олди.
«Никоҳда тўртта бола бор, ажрашиш ҳақида гап бўлиши мумкин эмас», — деди судья.Хема уч кун йиғлади, шундан сўнг у севгилисига иккинчи хотин бўлишга тайёрлигини билдирди. Шу ўринда қайд этиш керакки, Ҳиндистонда қўшхотинлилик тақиқланган, бундан ташқари, иккинчи хотин —маъшуқа бўлиш ўз оиласини шарманда қилишни англатарди. Ҳема фақатгина севгилисидан ажралмаслик учун бу йўлни танлади. Шундай қилиб, улар саккиз йил катта ўғли вояга етгунга қадар яшадилар ва уларнинг бу турмушига қарши бўлган Ҳеманинг отаси вафот этди.
Ҳема ва Дҳармендранинг тўйи уч кун давом этди. Уч кун ичида бахтли келин ўз фильмларида ижро этгани каби энг яхши рақсларини ижро этди. Ва ниҳоят унинг 8 йил кутган орзуси амалга ошди.
Бир йил ўтгач, Ҳема иккита қиз Эша ва Аханни дунёга келтирди. Шу билан бирга, у онаси сингари «Hema Malini creations» продюсерлик компаниясини ташкил этиб, бизнес билан шуғуллана бошлади.
Ҳар йили компания 20 дан ортиқ кинокартина суратга олади, Дҳармендра ва Малини оиласининг бойлиги ортиб бормоқда. Ҳема турмуш ўртоғи билан бирга ҳашаматли уй қуришди, бу уйда энди невараларининг қувноқ овозлари эшитилмоқда.
Ажабланарлиси шундаки, бу уй дастлаб Мумбай аэропорти яқинидаги хароба эди. «Зита ва Гита»дан олинган гонорардан сўнг эр-хотин уйни беш қаватли қилиб қуришди. Энди бу уйда рақс зали, кутубхона ва ҳатто, ибодатхона ҳам бор.
Ҳема ҳозир фильмларда рол ижро этмайди, оналар ролига ҳам қизиқмайди, фақат гоҳ-гоҳида у режиссёр-дўстларнинг фильмларидаги эпизодик ролларигагина рози бўлади. Болливудда «орзудаги қиз» дея аталадиган қиз, 40 йилдан сўнг сиёсатга киришди. Турмуш ўртоғи бу қарорда уни қўллаб-қувватлади. Малини Ҳиндистон парламентининг юқори палатасида Ҳиндистон халқ партияси вакили. 2014 йилда у Лок Сабҳа депутати этиб сайланган.
«Кўп йиллар мобайнида мен ҳеч қачон бахтли бўлмайман деб ўйлардим, лекин баъзи бир тушунарсиз йўллар билан Худо мени керакли жойга олиб борди. Бугун мен ҳеч нарса қилмаяпман, бор нарсамдан хурсандман», — дея иқрор бўлди актриса интервьюсида.Мавзуга доир:
Изоҳ (0)