Бугунги кунда ҳинд киносининг аксарият мухлислари Хани Иранини “Зита ва Гита” фильмидаги Каушалянинг замонавий ва бир оз инжиқ қизи Шейла роли орқали эслашади. Эски ҳинд фильмлари мухлислари Хани Иранининг болалигидан фильмларда рол ўйнашни бошлаганини билишади. Бироқ бу кучли аёлнинг бошига тушган синовлар ҳақида ҳамма ҳам тўлиқ маълумотга эга эмас.
Ҳани Ирани 1954 йилнинг 25 август санасида (бошқа маълумотларга кўра, 1955 йилда туғилган) Перин ва Ношир Ирани оиласида туғилган. Жуфтликнинг оиласида беш фарзанд бўлиб, Хани уларнинг энг кичиги эди. Перин ва Ношир Менаки, Банни, Сарош ва Дейзи исмли фарзандларга ҳам тарбия беришган.
Онаси уни ва опаси Дейзини кино соҳасига йўналтирганда, Хани тахминан тўрт ёшда эди. Хани ва Дейзи 1950—1960 йиллардаги жуда машҳур бўлган ёш актрисалар эди. Ханнининг ҳинд киносидаги энг эътирофга сазовор ишларидан бири “Фарзанд” (1959 йилда суратга олинган) фильми бўлиб, бу лойиҳада у Ражендра Кумарнинг ўғли ролини ўйнаган. Шундан сўнг унинг иштирокидаги “911-рақамли маҳбус” ва “Бомбей ўғриси” фильмлари экранларга чиқди.
Ҳани кинодаги фаолияти давомида 70 дан ортиқ фильмларда суратга тушган. У вояга етганида Аша Парекх ва Ражеш Ханнам, Дҳармендра, Санжив Кумар, Ҳема Малини иштирокидаги “Зита ва Гита” фильмида иккинчи даражали ролни ижро этди.
Айнан “Зита ва Гита” фильмини суратга олиш майдончасида Хани ссенарист Жавед Ахтар билан танишиб, улар орасида илиқ муносабатлар пайдо бўлади. Кейинроқ улар турмуш қуради ҳамда Хани жуда эрта, 16 ёшида илк марта она бўлади.
Актрисанинг сўзларига кўра, у ҳеч қачон қаҳрамон бўлишга интилмаган ва биринчи имконият туғилиши билан турмушга чиққан, кинони ташлаб, ўзини фарзанд тарбиялашга бағишлаган. Орадан бир йилдан сал кўпроқ вақт ўтгач, уларнинг оиласида яна бир фарзанд — Фархон исмли ўғил дунёга келди.
Жавед Ханидан 10 ёш катта эди, шу билан бирга, ўша пайтда унинг карьераси энди бошланаётган эди, бу эса оилада қийинчиликларни юзага келтирган. Жуфтликнинг ўз уйи бўлмаган ва улар Иранининг опаси билан кичкина хонада яшаган.
Ханининг онаси Жаведни умуман ёқтирмасди. У актриса билан турмуш қуришини айтиш учун келганида, пул топмаслигини, фақат ичиши, чекиши, қимор ўйнашини айтди. Жуфтлик оилавий ҳаётларининг биринчи йилларида жуда камтарона яшади, кўп ҳолларда улар моддият билан боғлиқ муаммоларга дуч келарди. 1970 йилларнинг охирида Ханининг турмуш ўртўги актриса Шабана Азми билан ишқий муносабатда бўлиб, уни иккинчи хотин сифатида олди.
Турмуш ўртўгининг оиласини ташлаб кетганидан қайғурган Хани олти ёшли Зоя ва тўрт ёшли Фархон билан ёлғиз қолади. Жавед алимент тўларди, бироқ бу жуда кам эди. Кейинчалик эса Хани ўзини ва болаларини таъминлаш мақсадида сариларга кашта тикишни бошлади. Қизиғи шундаки, Хани ёшлигидан ҳикоялар ёзган ва баъзида уларни турмуш ўртўги билан баҳам кўрган.
Турмуш ўртоғи унга: “Сизда истеъдод бор ва ёзишни давом эттиришингиз керак. Ҳикояларингиздан иборат китоб чиқаришингиз мумкин”, — деб айтган.
Кунларнинг бирида Хани ўз ҳикоясини Яш Чопранинг турмуш ўртоғи Памелага сўзлаб беради, Яш Чопрага бу ғоя шу қадар ёқадики, 1993 йилда у Жеки Шрофф, Жуҳи Чавла, Амрита Сингҳ иштирокидаги “Севги учбурчаги” номли фильмни суратга олади.
Яш Чопра Ханидан кейинчалик Шридеви ва Анил Капур иштирокидаги “Севги онлари” фильмига асос бўлган сюжетни ёзишни сўради. Лойиҳа Иранининг сценарий муаллифи сифатидаги дебютига айланди ва унинг “Энг яхши ссенарист” сифатида Filmfare мукофотини қўлга киритишига сабабчи бўлди. Шу орқали Хани Иранининг сценарий муаллифи сифатидаги муваффақиятли фаолияти бошланди. 2002 йилда у яна Прити Зинта иштирокидаги фильм учун мукофотни олди ва бундан олдин эса у Ритик Рошан иштирокидаги “Севгидан воз кечмайдилар” фильмининг лауреатига айланган эди.
Шунингдек, Хани “Муҳаббат ва қўрқув” (1993 йилда суратга олинган) ва “Криш” франшизаси фильмлари учун сценарий ёзган. Хани Иранинининг фарзандлари Зоя Ахтар ва Фархон Ахтар машҳур режиссёр бўлди. Унинг жиянлари (Менака исмли опасининг фарзандлари) Сажид Хон ва Фараҳ Хон ҳам Болливудда муваффақиятга эришди. Сажид режиссёр, Фараҳ ҳам ажойиб хореограф.
2003 йилда Хани Ирани режиссёр бўлишга ҳаракат қилди ва Амитабҳ Баччан, Прити Зинта ва Анил Капур иштирокидаги “Умид” фильмини суратга олди. Бироқ лойиҳа кассада муваффақиятсизликка учради, шундан сўнг Хани бошқа камера орқасига ўтишга журъат эта олмади.
Хани Ирани ёлғиз оналик мақомига эга бўлишига ва турмуш ўртоғи билан ажрашганига қарамай, у билан илиқ муносабатда бўлган ва фарзандларини отасига меҳрибон қилиб тарбиялаган. У яна икки марта унаштирилди, бироқ иккала никоҳ ҳам бекор қилинди ва актриса умуман турмушга чиқмади.
Хани Ирани ҳеч қачон ссенарист бўламан деб ўйламаган, чунки у бир кун ҳам мактабга бормаган. “Ўша пайтда ёзувчилар жуда олий маълумотли инсонлар эди. Мен эса мактабга ҳам бормаганман. Бироқ менинг шахсий билимим, ҳис-туйғуларим, қаҳрамонлар ва ҳаётни тушуниш — буларнинг барчаси мени ёзувчилик йўлига олиб кирди”, — дейди актриса.
Хани Ирани томошабинларга бир қанча яхши фильмларни тақдим этди, бироқ у фарзандлари суратга олган фильмлар билан кўпроқ фахрланади.
Изоҳ (0)