“Мен ҳамма нарсамни йўқотдим”. Америкалик актриса Шерон Стоун саломатлиги ва карьерасига инсульт қандай таъсир ўтказгани ҳақида

Америкалик актриса Шерон Стоун People нашрига берган интервьюсида инсульт касаллиги унинг ҳаётида қандай асорат қолдиргани ҳақида сўзлаб берди. Жаҳон киноси юлдузининг сўзларига кўра, у агар суткасига 8 соатдан кам ухласа, унда тутқаноқ тутади.

“Узоқ вақт мобайнида мен ўзимни худди ҳаммаси кўнгилдагидек тутдим. Лекин агар суткасига 8 соатдан кам ухласам, мия учун дориларим таъсир қилмайди ва менда тутқаноқ бошланади”, — дейди Голливуд актрисаси.

Актрисанинг сўзларига кўра, инсультдан сўнг унинг имкониятлари чекланган, айнан шунинг учун ҳам уни ҳар доим ҳам фильмларга олишмаган.

“Бу мен сўнгги 22 йил ичида тўқнаш келаётган ҳолат. Ва мен эндигина бу ҳақда очиқ гапиряпман”, — дейди Шерон Стоун.

Актриса 2001 йилда инсультни бошдан кечирган. Унинг қайта тикланишига узоқ йиллар керак бўлди, эндиликда Стоун доимий равишда дорилар қабул қилиб юриши керак. Унда шунингдек хотира билан боғлиқ муаммолар ҳам кузатилмоқда.

 “Мен ҳамма нарсани йўқотдим. Пулларимни, карьерамни, асраб олган фарзандим учун васийлик ҳуқуқимни ҳам қўлдан бой бердим. Мен ҳаётимнинг мазмунини ташкил этган нарсаларни йўқотдим. Бой берган нарсаларимнинг аксар қисмини қайтара олмадим, аммо шу онда ҳаётда шунчаки яшаш ҳам етарли эканлигини англамоқдаман”, — дейди актриса.