Хитой ташқи ишлар вазири Ван Йи Исроил мудофаа кучларининг Ғазо секторидаги ҳаракатлари “ўзини ҳимоя қилишдан ташқарига чиққанини” айтди.
Вазир Исроил расмийлари ва ҳарбийларини Ғазо секторида яшовчи фаластинликларни “жамоавий жазолаш”дан воз кечишга чақирди.
“Хитой тинч аҳолига зарар етказувчи барча ҳаракатларга қарши чиқади ва қоралайди, чунки улар инсон виждонига зид келади ва асосий халқаро қонунларни бузади”, — деди Ван Йи Саудия Арабистони ташқи ишлар вазири Файсал бин Фархон билан телефон суҳбатида.
Хитой ТИВ раҳбарининг сўзларига кўра, Исроил ҳарбий можаронинг янада авж олишидан тийилиши ва Фаластиннинг ҲАМАС исломий ҳаракати вакиллари билан зудлик билан тинчлик музокараларини бошлаши керак.
Ван Йи тушунтирганидек, Хитой ҳозирда урушни тугатиш учун барча томонлар билан яқиндан ҳамкорлик қилмоқда. “Хитой Фаластинга қарши ярим асрдан ортиқ давом этаётган тарихий адолатсизлик давом этиши керак эмас, деб ҳисоблайди”, — дея қўшимча қилди Хитой ташқи ишлар вазири.
Изоҳ (0)