Қирғизистон ҳукумати Гонконг ва Макаодан келадиган Хитой фуқаролари учун визасиз режим жорий этишга қарор қилди. Бу ҳақда Қирғизистон Вазирлар Маҳкамаси раиси ўринбосари Эдил Байсалов “Қирғизистон—Хитой” дўстлик жамияти конференциясида маълум қилди.
Унинг сўзларига кўра, бу қадам мамлакатлар ўртасидаги дўстона алоқалар ва халқ дипломатиясини мустаҳкамлашга қаратилган.
“Визасиз саёҳат маданий ва иқтисодий ҳамкорликни кенгайтиради. Гонконг ва Макао аҳолисидан ташқари, АҚШ, Буюк Британия ёки Европа Иттифоқига кириш визасига эга Хитой фуқаролари ҳам бу имкониятдан фойдаланиши мумкин”, — деди у.
Ушбу сиёсий қарор “Бир камар, бир йўл” ташаббусининг 10 йиллигига тўғри келди.
Аввалроқ худди шундай таклиф Қирғизистон Ташқи ишлар вазирлиги раҳбари Жеенбек Кулубаев томонидан 26 апрель куни ўша пайтдаги Хитой ТИВ раҳбари Син Ган билан учрашув якунида билдирилган эди. Ўшанда Бишкек ва Пекин қирғизистонлик юк машина ҳайдовчилари учун виза режимини соддалаштиришни кўриб чиққан.
Шу тариқа, визасиз режимнинг жорий этилиши икки томонлама мулоқотнинг мантиқий давомига айланди. Бу Қирғизистон—Хитой муносабатларини янги стратегик шериклик даражасига олиб чиқиши кутилмоқда.
Изоҳ (0)