Қирғизистоннинг Иссиқкўл соҳилидаги “Эделвейс” ўқув марказида Коллектив Хавфсизлик Шартномаси Ташкилотига аъзо мамлакатларнинг “Мустаҳкам биродарлик-2023” ҳарбий машғулотлари бошланди, деб хабар қилди республика Мудофаа вазирлиги матбуот хизмати.
9—13-октябр кунлари Қирғизистон Мудофаа вазирлиги 20636-ҳарбий қисмининг “Эделвейс” ўқув марказида КХШТга аъзо давлатлар тинчликпарвар кучлари билан “Мустаҳкам биродарлик-2023” қўшма машғулотлари бўлиб ўтади, — деди матбуот хизмати вакили.
Машғулотларда қатнашиш учун Беларусь, Қозоғистон, Россия ва Тожикистон ҳарбий контингентлари полигонга етиб борган. Қўшма машғулотларда Қўшма штаб ва КХШТ котибиятининг тезкор гуруҳлари ҳам иштирок этади.
Машғулотлар мавзуси КХШТнинг коллектив тинчликпарвар кучлари томонидан тинчликпарвар операцияга тайёргарлик кўриш ва ўтказишдан иборат бўлади.
Қирғизистон ҳарбий вазирлигида таъкидланганидек, тадбирда “КХШТ тинчликпарвар кучлари қўмондонлиги ва шахсий таркиби мансабдор шахсларининг амалий кўникмаларини ошириш, Марказий Осиё коллектив хавфсизлик минтақасида тинчликпарварлик операцияси топшириқларини бажаришда бўлинмаларнинг уюшқоқлигини кучайтириш мақсад қилинган”.
“Баланд тоғли шароитда ўтказиладиган машғулотлар давомида шартли инқироз зонасида можародан кейинги вазиятни ҳал этиш вазифалари – КХШТ коллектив хавфсизлик тизими кучлари ва воситаларидан фойдаланган ҳолда тинчликпарвар операция ўтказиш ва инсонпарварлик ёрдами кўрсатиш бўйича амалий машғулотлар ўтказилади”, — дейилади Мудофаа вазирлиги хабарида.
КХШТга аъзо давлатлар ҳарбийлари амалиётда Фавқулодда вазиятлар вазирлиги ва Ички ишлар вазирлиги бўлинмалари билан назорат-ўтказиш пунктлари ва жабрланганларни қабул қилиш пунктларида жангавор тайёргарлик бўйича топшириқларни биргаликда бажаради, колонналар ва юкларни кузатиб боради, шартли аҳоли пунктларини озод қилади, “гаровга олинганларни” қутқариш ва гуманитар ёрдам кўрсатишни машқ қилади, деб таъкидлади вазирлик.
Изоҳ (0)