Термиз шаҳрида 2021 йил 27 сентябрь куни Сурхондарё ва Балх вилоятлари ҳокимлари бошчилигида Ўзбекистон ва Афғонистон чегараолди ҳудудлари бошқарув идоралари вакилларидан иборат ишчи гуруҳларининг йиғилиши бўлиб ўтди.
Тадбир афғон томонининг илтимосига биноан Афғонистонга импорт молларини транзит ташуви билан боғлиқ масалаларни ҳал этиш мақсадида ташкил этилди. Мулоқот даставвал энг зарур халқ истеъмол товарлари – озиқ-овқатлар, дори-дармон, тиббий анжомлар, кийим-кечак ва ёнилғи хусусида борди.
Учрашувда муҳокама этилган масалалар, жумладан, Афғонистонда юзага келган оғир гуманитар вазият даврида мамлакатга юкларни етказиб бериш ва транзит ўтказишда мавжуд муаммоларни ҳал этишга қаратилган чора-тадбирларни амалга ошириш бўйича келишувга эришилди.
Йиғилиш сўнггида томонлар энг долзарб чегараолди масалалари юзасидан ишчи алоқаларини давом эттиришга тайёр эканини билдирди.
Бундан аввал Туркий кенгашга аъзо давлатлар ташқи ишлар вазирларининг Афғонистон бўйича қўшма баёноти қабул қилингани ҳамда Афғонистон чегарасида ўзбекистонлик ҳарбий ҳалок бўлгани ҳақида хабар берилганди.
Изоҳ (0)