Республика шошилинч тиббий ёрдам илмий маркази Наманган филиалида соғлиқни сақлаш вазирининг ўринбосари Элмира Боситхонова, Наманган вилояти ҳокимининг ўринбосари Ботиржон Нуриддинов ва ОАВ вакиллари иштирокида матбуот анжумани ўтказилди. Бу ҳақда Наманган вилояти ҳокимлиги матбуот хизмати хабар берди.
Мулоқот давомида вазир ўринбосари болаларда кузатилган нохуш ҳолат дастлабки текширувларга кўра, дори воситалари ёки овқатдан заҳарланиш эмаслигини алоҳида таъкидлаб, ҳозирда 20 га яқин анализ хулосалари олингани ва чуқурлаштирилган таҳлиллардан сўнг вазиятга аниқлик киритишини билдирган.
“Ижтимоий тармоқларда тарқалаётган турли хабарларга ишонавермаслик, бундай жараёнда фақатгина мутахассисларнинг фикрига таяниб ахборот тарқатилиши керак. Айни пайтда саломатлигидан шикоят қилиб келаётган ёш болаларнинг 85 фоизи соғлиги жойида, уйларига қайтишга бирин-кетин рухсат берилмоқда. Қолганлари куннинг бошида рўйхатга олинган бўлиб, уларнинг ҳам аҳволи яхшиланиб бормоқда”, — дейди Республика ишчи гуруҳи раҳбари Элмира Боситхонова.
21 сентябрь куни Наманган вилоятининг Чуст туманидаги болалар боғчаларида тарбияланувчи болаларнинг оммавий заҳарланиши кузатилди. Вилоят Мактабгача ва мактаб таълими бошқармаси заҳарланган болалар сони 71 нафар эканини билдирган бўлса, Бош прокуратура Чустда Фавқулодда ҳолат эълон қилинганини инкор этганди. Соғлиқни сақлаш вазирлиги баёнотига кўра, ҳолат вазир назоратига олинган. Ўз навбатида ССВ мактаб ва боғчаларга тарқатилган ёд препарати истеъмолини тўхтатишга кўрсатма берди.
Аввалроқ Чустда болаларнинг оммавий заҳарланиши ортидан соғлиқни сақлаш вазири ўринбосари Элмира Боситхонова ишдан олингани ҳақидаги хабарлар юзасидан изоҳ берилган эди.
Изоҳ (0)