Ўзбекистон элчиси Фурқат Сиддиқов Бразилиянинг АҚШдаги элчиси Мария Виотти билан учрашув ўтказди. Бу ҳақда “Дунё” агентлиги хабар берди.
Мария Виотти Бразилияда ўрнатилган протокол тартиб ва таомилларга мувофиқ ҳамда Ўзбекистон элчисини аккредитация қилиш масаласини тезлаштириш мақсадида, ушбу мамлакат Ташқи ишлар вазирлиги унга ишонч ёрлиғи нусхасини қабул қилиш учун ваколат берганлигини маълум қилган. Шу муносабат билан Бразилиянинг АҚШдаги дипломатик ваколатхонасида Ўзбекистоннинг Бразилиядаги элчиси (қароргоҳи Вашингтонда) тайинланганли тўғрисидаги ишонч ёрлиғи нусхасини топшириш маросими бўлиб ўтган.
Бразилия элчиси сўнгги йилларда икки томонлама савдо айланма мисли кўрилмаган даражада ошиб январь август ойларида 500 миллион долларга етганини, Ўзбекистон Бразилиянинг Марказий Осиё минтақасидаги асосий иқтисодий ҳамкорига айланганини қайд этган.
Учрашув давомида Бразилия ҳукумати томонидан Тошкентда элчихона очиш масаласи ўрганиб чиқилаётгани маълум қилинган.
Учрашув якунида томонлар ишонч ёрлиғининг асл нусхасини Бразилия президенти Луис да Сильвага топшириш учун Ўзбекистон эличисининг ушбу мамлакатга ташрифини 2023 йилнинг охирига қадар уюштириш бўйича келишиб олган.
Август охирларида Ўзбекистоннинг АҚШдаги элчиси Фурқат Сиддиқов ўриндошлик асосида Ўзбекистоннинг Бразилиядаги элчиси этиб тайинланганди. 2017 йилдан бери Ўзбекистоннинг АҚШдаги элчиси сифатида ишлаган Жавлон Ваҳобов 2 апрель куни Ўзбекистоннинг АҚШ, Канада ва Бразилиядаги элчиси лавозимидаги фаолиятини якунлаб, Ўзбекистонга қайтиб келганди.
Изоҳ (0)