Қашқадарё вилоятидаги ерга оид қонунбузилишларининг энг кўпи Яккабоғ ва Қарши туманлари ҳисобига тўғри келиши маълум бўлди. Бу ҳақда “Дарё”га Кадастр агентлигининг Қашқадарё вилояти бошқармаси ахборот хизмати раҳбари Намоз Чориев хабар берди.
Таъкидланишича, вилоятда бошқарма ва унинг ҳудудий бўлимлари томонидан сўнгги 9 ой давомида ер участкаларини ўзбошимчалик билан эгаллаб олиш ва ушбу ер участкаларида ноқонуний иморат қурилишига оид ҳолатлар ўрганиб чиқилган.
Ўрганишлар давомида 1524 та ҳолатда 775,9 гектар ер майдонида қонунбузарлик ҳолатлари аниқланди. Шундан 592 та ҳолатдаги 283,2 гектар ер майдондаги ҳолатлар фуқаролар томонидан ихтиёрий тарзда бартараф этилди, — дейди Намоз Чориев.
Ўрганиш хулосаларига асосланиб, Фуқаролик ишлари бўйича судларга ер участкаларини ўзбошимчалик билан эгалланган ер майдонида ноқонуний қурилган иморатларни бартараф этиш тўғрисида 781 та (468,7,4 гектар) даъво аризалари киритилган.
Шаҳар, туманлар кесимида таҳлил қилинганда, ерларни ҳуқуқий ҳужжатларсиз ноқонуний эгаллаб олиш ҳолатларининг энг кўпи Яккабоғ (126 та ҳолатда, 19,9 гектар майдонда) ва Қарши туманида (122 та ҳолатда, 100,9 гектар майдонда) Косон туманида 109 та ҳолатда 141,6 гектарни ташкил қилиши маълум бўлди, — дейди масъул.
Бошқарма ахборот хизмати ерларни ноқонуний эгаллаб олиш қонунчиликка кўра, маъмурий ва жиноий жавобгарликка сабаб бўлишини эслатган.
Изоҳ (0)