Qirg‘izistonda KXSHT qo‘shma mashg‘ulotlariga start berildi (video)

Qirg‘izistonning Issiqko‘l sohilidagi “Edelveys” o‘quv markazida Kollektiv Xavfsizlik Shartnomasi Tashkilotiga aʼzo mamlakatlarning “Mustahkam birodarlik-2023” harbiy mashg‘ulotlari boshlandi, deb xabar qildi respublika Mudofaa vazirligi matbuot xizmati.

9—13-oktyabr kunlari Qirg‘iziston Mudofaa vazirligi 20636-harbiy qismining “Edelveys” o‘quv markazida KXSHTga aʼzo davlatlar tinchlikparvar kuchlari bilan “Mustahkam birodarlik-2023” qo‘shma mashg‘ulotlari bo‘lib o‘tadi, — dedi matbuot xizmati vakili.

Mashg‘ulotlarda qatnashish uchun Belarus, Qozog‘iston, Rossiya va Tojikiston harbiy kontingentlari poligonga yetib borgan. Qo‘shma mashg‘ulotlarda Qo‘shma shtab va KXSHT kotibiyatining tezkor guruhlari ham ishtirok etadi.

Mashg‘ulotlar mavzusi KXSHTning kollektiv tinchlikparvar kuchlari tomonidan tinchlikparvar operatsiyaga tayyorgarlik ko‘rish va o‘tkazishdan iborat bo‘ladi.

Qirg‘iziston harbiy vazirligida ta’kidlanganidek, tadbirda “KXSHT tinchlikparvar kuchlari qo‘mondonligi va shaxsiy tarkibi mansabdor shaxslarining amaliy ko‘nikmalarini oshirish, Markaziy Osiyo kollektiv xavfsizlik mintaqasida tinchlikparvarlik operatsiyasi topshiriqlarini bajarishda bo‘linmalarning uyushqoqligini kuchaytirish maqsad qilingan”.

“Baland tog‘li sharoitda o‘tkaziladigan mashg‘ulotlar davomida shartli inqiroz zonasida mojarodan keyingi vaziyatni hal etish vazifalari – KXSHT kollektiv xavfsizlik tizimi kuchlari va vositalaridan foydalangan holda tinchlikparvar operatsiya o‘tkazish va insonparvarlik yordami ko‘rsatish bo‘yicha amaliy mashg‘ulotlar o‘tkaziladi”, — deyiladi Mudofaa vazirligi xabarida.

KXSHTga a’zo davlatlar harbiylari amaliyotda Favqulodda vaziyatlar vazirligi va Ichki ishlar vazirligi bo‘linmalari bilan nazorat-o‘tkazish punktlari va jabrlanganlarni qabul qilish punktlarida jangavor tayyorgarlik bo‘yicha topshiriqlarni birgalikda bajaradi, kolonnalar va yuklarni kuzatib boradi, shartli aholi punktlarini ozod qiladi, “garovga olinganlarni” qutqarish va gumanitar yordam ko‘rsatishni mashq qiladi, deb ta’kidladi vazirlik.