Ўзбекистон ва Хитой ҳудудлараро ҳамкорликни янада ривожлантириш истиқболларини муҳокама қилди, деб хабар бермоқда “Дунё” АА.
Маълум қилинишича, Ўзбекистоннинг Гуанчжоудаги Бош консулхонаси дипломатлари ишчи ташриф билан Жанубий Хитойнинг Гуанси автоном районига борди. Сафар давомида Гуанси автоном райони Ташқи ишлар департаменти бош директори ўринбосари Сонг Хай Жин, Тижорат вазирлиги ҳудудий департаменти директори ўринбосари доктор Юе Сюмей ва Хитой халқаро савдони рағбатлантириш ташкилоти раиси Янг Ян билан учрашувлар ўтказилди.
Бўлиб ўтган учрашувлар чоғида савдо-иқтисодий ҳамкорлик, маданий ва туризм алоқаларини ривожлантириш масалалари муҳокама қилинди.
Хусусан, ҳудуд Ташқи ишлар департаменти раҳбарияти билан мулоқотда ҳудудлараро ҳамкорлик, маданий ва туризм алоқаларини ривожлантириш хусусида фикр алмашилди. Томонлар ҳудудий корхоналар ўртасида ўзаро кооперация алоқаларини ўрнатиш ва инвестицияларни жалб қилиш юзасидан ҳамкорликни чуқурлаштириш зарурлигини таъкидлади. Қишлоқ хўжалиги ва туризм йўналишларида ҳамкорлик қилиш учун катта салоҳият мавжудлиги қайд этилди.
Тижорат вазирлиги ҳудудий департаменти директори ўринбосари доктор Юе Сюмей билан бўлиб ўтган учрашув давомида савдо-иқтисодий ва саноат кооперацияси соҳасидаги ҳамкорликни янада чуқурлаштириш масалалари кўриб чиқилди.
Ўзбекистонда муваффақиятли бизнес бошлаш ва хорижий инвестициялар иштирокида қўшма лойиҳаларни амалга ошириш учун яратилган қулай имкониятлар, GSP+, малакали ишчи кучи, Марказий Осиё, Афғонистон бозорларига чиқиш учун қулай транспорт инфраструктураси ва МДҲ, шунингдек, Европа Иттифоқи мамлакатлари бозорларига Ўзбекистонда ишлаб чиқарилган маҳсулотлар билан киришда мавжуд божхона имтиёзлари тўғрисида тўлиқ маълумот берилди.
Хитой халқаро савдони рағбатлантириш ташкилотидаги учрашувда томонлар ҳудудий тадбиркорлар ва бизнес вакиллари иштирокида қўшма лойиҳаларни амалга ошириш масалалари муҳокама қилинди.
Хитой томонига Ўзбекистондаги бизнес вакиллари учун яратилган имкониятлари ва Ўзбекистон тадбиркорлари томонидан ишлаб чиқарилаётган юқори сифатли қурилиш материаллари, экологик тоза қайта ишланган маҳсулотларни Гуанси бозорига етказиб беришга тайёрликлари билдирилди.
Ташкилот раиси Янг Ян ўзбекистонлик тадбиркорлар билан провинциядаги бизнес соҳа вакиллари ўртасида савдо-иқтисодий алоқаларни ўрнатиш ва кенгайтиришда ўз ҳиссасини қўшишга тайёрлигини маълум қилди.
Изоҳ (0)