Тошкент вилоятида божхоначилар Ўзбекистон ҳудудига пневматик қуролни ноқонуний олиб кирилишига чек қўйди. Бу ҳақда вилоят Божхона бошқармаси хабар берди.
Маълум қилинишича, “Яллама” чегара божхона пост ходимлари томонидан Ўзбекистонда фаолият олиб бораётган масъулияти чекланган жамиятлардан бирининг номига курерлик жўнатмалари божхона назоратидан ўтказилган.
Ташкилотнинг ишончли вакили ҳамда холислар иштирокида ўтказилган текширув давомида Mercedes-Benz Vito русумли бўлган автотранспорт воситасига юкланган курерлик жўнатмалари орасида ҳеч қандай рухсат берувчи ҳужжатлари бўлмаган бир дона Сталкер С84 номли пневматик қуроли, бир дона Quarta air strike номли газ балони ҳамда 1 250 дона ўқ борлиги аниқланган.
Ҳозирда ушбу ҳолат юзасидан божхона органлари томонидан суриштирув ҳаракатлари давом этмоқда.
Ўзбекистонда қуролдан фойдаланиш тартиби
Ўзбекистонда “Қурол тўғрисидаги” қонун 2019 йил 29 июлда президент томонидан имзоланган. Фуқаровий ва хизмат қуроли ҳамда унинг ўқ-дориларини ишлаб чиқариш, таъмирлаш ва реализация қилиш бўйича фаолият фақат Ўзбекистон ҳудудида белгиланган тартибда рўйхатдан ўтган юридик шахслар томонидан амалга оширилади. Ўзбекистонда ноқонуний сақланган қуролларни ўз ихтиёри билан ИИВга топширганларга пул мукофоти берилади.
2022 йилда “Прокуратура тўғрисида”ги қонунга киритилган ўзгартиришларга кўра, прокуратура органлари ходимлари хизмат қуроли ва шахсий ҳимоя воситаларини қонунчиликда белгиланган тартибда сақлаш, олиб юриш ҳамда улардан фойдаланиш ҳуқуқига эгалиги белгиланганди (илгари фақатгина олиб юриши мумкинлиги кўрсатилган).
Изоҳ (0)