Ижтимоий тармоқларда “Энди хонадонда бирданига учта кондиционерни уласангиз, ҳисоблагич токни автоматик тарзда узади” ёки “Ҳисоблагич орқали 10-15 кВ қувват доирасида чеклов киритилади” сарлавҳали хабарлар кенг тарқалди. “Ҳудудий электр тармоқлари” АЖ мазкур ҳолат юзасидан “Дарё”га маълумот берди.
Унга кўра, Вазирлар Маҳкамасининг 22-сонли қарори билан ўзгартириш киритилган “Электр энергиясидан фойдаланиш қоидалари”нинг тегишли бандига асосан, жорий йил 1 ноябрдан бошлаб истеъмолчиларга эҳтиёжлари учун зарур бўлган қурилмаларнинг минимал қувватидан (ҳамда жойлашган ҳудудидан) келиб чиқиб, ҳисоблагич орқали 10-15 кВ қувват доирасида чеклов киритилиши белгиланган.
Бундай чора эскирган ва ортиқча юклама билан ишлаётган электр тармоқлари ва трансформатор пунктлари жойлашган маълум бир ҳудудларда истеъмолчиларни узоқ вақт электр таъминотидан узилиб қолмаслигини таъминлаш мақсадида зарурат юзасидан қўлланилади. Яъни бу йил қиш ва ёз ойларида кузатилган ноқулай об-ҳаво шароити каби вазиятлардагина вақтинча электр тармоқларига ортиқча юкламалар тушишини олдини олиш учун амалга оширилади.
Юқоридаги қарорга асосан “Ҳудудий электр тармоқлари” томонидан электр энергиясини назорат қилиш ва ҳисобга олишнинг автоматлаштирилган тизими доирасида истеъмолчиларга эҳтиёжлари учун зарур бўлган қурилмаларнинг минимал қувватидан ҳамда жойлашган ҳудудидан келиб чиққан ҳолда ҳисоблагич орқали 10-15 кВ қувват доирасида чеклов киритилиши белгиланган.
Изоҳ (0)