Ироқ Туркманистон газини SWAP (ўрнини қоплаш шарти билан — “Дарё”) схемаси бўйича қўшни Эрон ҳудуди орқали узоқ муддатли шартномалар асосида камида беш йил муддатга импорт қилишдан манфаатдор эканини билдирди.
Туркманистон Ташқи ишлар вазирлигининг хабар беришича, “Туркменгаз” давлат концерни раҳбари Мақсат Бабаев 2023 йилнинг 5—8-октябрь кунлари Бағдодда амалий ташриф билан бўлган. Музокаралар натижасида Ироқ электр энергетика вазирлиги билан ҳамкорлик меморандуми имзоланди.
Томонлар келгусида газ саноати соҳасида ҳамкорликдаги фаолиятнинг ҳуқуқий, тижорий, молиявий ва ташкилий шартларини муҳокама қилган.
“Ироқ томони ҳар йили 10 миллиард куб метр ҳажмдаги Туркманистон табиий газини қабул қилишга тайёр”, — дейилади хабарда.
Матбуот хабарида айтилишича, музокаралар Ашхободда 2023 йил 25—27-октябрь кунлари “Туркманистон нефти ва гази” халқаро кўргазма ва конференцияси доирасида давом этади.
Мутахассисларнинг “Дарё”га маълум қилишича, туркман гази Ироққа Эрон орқали транзит йўл билан олиб кирилиши мумкин. Аввалроқ Эрон янги бозорларга йилига 15 миллиард куб метргача газ реекспорт қилишга тайёрлигини билдирган.
Озарбайжон 2022 йилдан бери худди шундай операциялар билан Эрон орқали Туркманистондан табиий газ олмоқда.
Эзиз Бояров
Изоҳ (0)