Туркманистон Жанубий Корея компаниялари билан темирйўллар ва тегишли инфратузилмани қуриш, электрлаштириш ва бошқа тегишли соҳаларда ҳамкорлик қилишдан манфаатдор. Бу ҳақда Туркманистон ҳукумати ҳузуридаги Транспорт ва коммуникациялар миллий агентлиги хабар берди.
Маълумотларга кўра, Тürkmendemirýоllary (“Туркман темирйўллари”) агентлиги раҳбарияти Корея темирйўллари корпорацияси ва Корея миллий темирйўллари компанияси вакиллари билан онлайн учрашув ўтказган.
“Томонлар Корея республикаси Ер ресурслари, инфратузилма ва транспорт вазирлиги иштирокида 2023 йил октябрь охири ёки ноябрь ойи бошида жанубий кореялик темирйўлчиларнинг Туркманистонга ташрифини ташкил этиш устида иш олиб боришга келишиб олди”, — дейилади хабарда.
Мутахассисларнинг “Дарё”га маълум қилишича, Туркманистонда темирйўлларни электрлаштириш бўйича ишлар олиб борилмоқда, хусусан, гап электродвигателлар ёрдамида бошқариладиган замонавий тепловозлар харид қилиш ҳақида кетмоқда.
Ашхобод сўнгги йилларда халқаро темирйўл орқали юк ташишда фаол иштирок этмоқда. 2014 йилда умумий узунлиги 900 километр бўлган Қозоғистон—Туркманистон—Эрон темирйўли ишга туширилганди.
Бу Шимолий Европа мамлакатлари ва Россиянинг Форс кўрфази, Ҳинд океани ва Жануби-Шарқий Осиё мамлакатлари билан транзит алоқаларини таъминлаш имконини берди.
2016 йилда Туркманистоннинг Отамурот шаҳридан Афғонистоннинг Акина қишлоғига темирйўл очилди. Ушбу участка Туркманистон—Афғонистон—Тожикистон йўналиши бўйлаб трансмиллий темирйўл лойиҳасининг бир қисми бўлди.
Эзиз Бояров
Изоҳ (0)