Хоразм вилояти Қўшкўпир туманидаги 19-сонли мактаб ўқувчилари ушбу мактаб директорига қарашли шоли даласида ишлашга мажбурлангани ҳақида хабарлар тарқалди. Камбағалликни қисқартириш ва бандлик вазирлиги ҳолат юзасидан баёнот берди.
Маълум қилинишича, ҳолат юзасидан Хоразм вилоят Камбағалликни қисқартириш ва бандлик бош бошқармаси Давлат меҳнат назорати инспекцияси ўрганиш олиб борди. Ўрганиш давомида Қўшкўпир туманидаги 19-мактабнинг 9-а синфи бир гуруҳ ўқувчилари тумандаги “Дурдона” маҳалласида жойлашган “Иброҳим балиқчи” фермер хўжалигига тегишли шоли даласида дарс машғулотларидан сўнг ушбу хўжалик раҳбарининг таклифига асосан, маълум бир ҳақ эвазига далада ўрилган шолини тўплаш ишларини бажаришга жалб қилингани аниқланган.
Аниқланган қонунбузилишлар юзасидан Қўшкўпир тумани “Иброҳим балиқчи” фермер хўжалиги раҳбарига вояга етмаган шахсларга нисбатан меҳнат қонунчилиги ва болалар меҳнатидан уларнинг соғлиғига, хавфсизлигига ёки ахлоқ-одобига зиён етказиши мумкин бўлган ишларда фойдаланганлиги учун Маъмурий жавобгарлик тўғрисидаги кодекснинг 49-моддаси 3-қисми ва 49¹-моддаси билан маъмурий баённома расмийлаштирилиб, жиноят ишлари бўйича Қўшкўпир туман судига ўтказилди.
Изоҳ (0)