Президент томонидан имзоланган қонун билан айрим қонун ҳужжатларига ўзгартиш ва қўшимча киритилди, деб хабар беради Telegram’даги “Ҳуқуқий ахборот” канали.
Қайд этилишича, “Маҳаллий давлат ҳокимияти тўғрисида”ги қонунга киритилган ўзгартиришга кўра, вилоятлар соғлиқни сақлаш бошқармалари ва Тошкент шаҳар соғлиқни сақлаш бош бошқармаси раҳбарлари ҳар ярим йиллик якунлари бўйича халқ депутатлари вилоятлар ва Тошкент шаҳар кенгашларига ҳисобот тақдим этади.
Мазкур ҳисоботни эшитиш якунлари бўйича тегишли халқ депутатлари кенгаши томонидан уларнинг фаолияти самарадорлигига баҳо берилади ҳамда тегишли қарор қабул қилиниб, қарор Соғлиқни сақлаш вазирлигига юборилади.
Бундан ташқари, туман (шаҳар) тиббиёт бирлашмаларининг раҳбарлари ҳар ярим йиллик якунлари бўйича халқ депутатлари туман (шаҳар) кенгашларига ҳисобот тақдим этади.
Ушбу ҳисоботни эшитиш якунлари бўйича тегишли халқ депутатлари кенгаши томонидан қарор қабул қилиниб, қарор соғлиқни сақлашни бошқариш ҳудудий органларига юборилади.
Шунингдек, “Фуқароларнинг ўзини ўзи бошқариш органлари тўғрисида”ги қонунга киритилган ўзгартиришга кўра, фуқаролар йиғини, тегишинча аҳоли бириктирилган, туман (шаҳар) кўп тармоқли марказий поликлиникалари, оилавий поликлиникалар ва оилавий шифокор пунктлари раҳбарларининг ахборотини эшитади.
Қонун расмий эълон қилинган кундан эътиборан кучга киради.
Бундан аввал ушбу “Соғлиқни сақлаш вазирлиги фаолиятини янада такомиллаштириш чора-тадбирлари тўғрисида”ги президент фармонида билан 2024—2026 йилларда соғлом турмуш тарзини шакллантириш, тўғри овқатланишни тизимли тарғиб қилиш ва оммалаштириш дастури ишлаб чиқилиши ҳақида хабар берилган эди.
Изоҳ (0)