Бутун дунёда одамлар соғлиғи қанчалик заиф эканлигига амин бўла бошлаган ва бунга эътибор бериб, ўз саломатлиги ҳақида қайғура бошлаган. Бу ҳақда 20 сентябрь куни Миллий матбуот марказида бўлиб ўтган Ўзбекистонда STADA Health Report 2023 тадқиқотининг натижаларига бағишланган матбуот анжуманида маълум қилинди, дея хабар бермоқда “Дарё” мухбири.
Таъкидланишича, сўровномада қатнашган Ўзбекистон аҳолисининг 24 фоизи шифокорларга тез-тез ташриф буюришини, 22 фоизи эса кўпроқ профилактик тиббий кўрикдан ўтганини айтган.
“Иштирокчиларнинг 21 фоизи эса соғлом озиқ-овқатлар истеъмол қила бошлаганини айтган.
Ўзбекистон аҳолисининг 26 фоизи дори-дармонларга, 10 фоизи янги озиқ-овқат маҳсулотларига, 8 фоизи соғломлаштириш муолажаларига сарфланадиган харажатларни қисқартирган”, — дейилади тадқиқотда.
Маълумотларга кўра, витаминларни қабул қилиш респондентларнинг 14 фоизи томонидан қайд этилган. Респондентларнинг 12 фоизи кўпроқ дори сотиб ола бошлаганини таъкидлаган. Шунингдек, 14 фоизи спорт ва саломатлик дастурларига кўпроқ вақт ажратган.
Таққослайдиган бўлсак, Қозоғистонда витаминларни қабул қилиш рўйхатнинг бошида туради: респондентларнинг 37 фоизи сўнгги 12 ой ичида витамин қабул қилиш миқдорини оширган. Ҳар тўртинчи қозоғистонлик (26 фоиз) соғлом овқатланишни бошлаганини қайд этган.
Маълумот учун, STADA соғлиқни сақлаш масалалари бўйича Human8 тадқиқот компаниясини жалб этган ҳолда халқаро жамоатчилик фикри сўровини ўтказган. Унга Ўзбекистонда “Ижтимоий фикр” маркази ҳамкорлик қилган.
Марказ телефон ёрдамида ўтказилган сўровнома орқали маълумотлар йиғган. Ҳар бир мамлакатда 2000 га яқин одам сўровномада (18 ёшдан 99 ёш оралиғида) 32 минг 13 нафар респондент тадқиқотда иштирок этган.
Мавзуга доир:
Изоҳ (0)