Тошкент шаҳар судида блогер Абдуқодир Мўминовга оид жиноят иши бўйича Миробод туман судининг 2023 йил 4 августдаги ҳукми устидан берилган шикоятига асосан аппеляция тартибида кўриб чиқиш бўйича очиқ суд мажлиси бўлиб ўтди. Бу ҳақда Олий суд матбуот котиби хабар берди.
Мазкур жиноят иши Тошкент шаҳар судининг жиноят ишлари бўйича судлов ҳайъати судьяси Д.Ражабов раислигида ҳамда судьялар М.Аҳмедов ва Ҳ.Шамшиевдан иборат суд таркибида кўриб чиқилган.
Тошкент шаҳар суди жиноят ишлари бўйича судлов ҳайъати аппеляция инстанциясининг 2023 йил 6-октябрдаги ажрими билан биринчи инстанция судининг Абдуқодир Мўминовга нисбатан чиқарилган ҳукми ўзгаришсиз, аппеляция шикоятлари эса қаноатлантирилмасдан қолдирилган.
“Ушбу ажрим устидан Олий суднинг Жиноят ишлари бўйича судлов ҳайъатига кассация тартибида шикоят берилиши ёки протест келтирилиши мумкинлиги маълум қилинади”, — дейилади хабарда.
YouTube платформасидаги “Кўзгу” саҳифаси муаллифи, блогер Абдуқодир Мўминов Жиноят кодексининг 141-1-моддаси (шахсий ҳаёт дахлсизлигини бузиш) 2-қисми “а”, “б” бандлари, 165-моддаси (товламачилик) 3-қисми “а” банди, 168-моддаси (фирибгарлик) 3-қисми “б”, “в” бандлари, 4-қисми “а” банди, 189-моддаси (савдо ёки хизмат кўрсатиш қоидаларини бузиш) 1-қисми ва 28,211-моддаси (пора беришда иштирокчилик) 3-қисми “а” бандида назарда тутилган жиноятларни содир этганликда айбланган.
Тасдиқланган айблов хулосасига кўра, мазкур жиноят иши бўйича 14 нафар жабрланувчи мавжуд бўлиб, жиноят оқибатида уларга жами 903 421 567,5 сўм миқдорида моддий зарар етказилгани аниқланган.
Суд ҳукми билан Мўминов 3 йил муддатга журналистик (блогерлик) фаолияти билан шуғулланиш ҳуқуқидан маҳрум қилган ҳолда 7 йил 3 ой муддатга озодликдан маҳрум қилиш жазоси тайинланган. Шунингдек, жабрланувчилар фойдасига жиноят оқибатида етказилган моддий ва маънавий зарарни ундириш белгиланган.
Изоҳ (0)