Бугун, 20 сентябрь куни Миллий матбуот марказида Ўзбекистонда кенг кўламли СТАДА Health Репорт 2023 тадқиқотининг натижалари тақдим этилди.
СТАДА соғлиқни сақлаш масалалари бўйича Human8 тадқиқот компаниясини жалб этган ҳолда халқаро жамоатчилик фикри сўровини ўтказган. Унга Ўзбекистонда “Ижтимоий фикр” маркази ҳамкорлик қилган.
Марказ телефон ёрдамида ўтказилган сўровнома орқали маълумотлар йиғган. Ҳар бир мамлакатда 2000 га яқин одам сўровномада (18 ёшдан 99 ёш оралиғида), 32 минг 13 респондент тадқиқотда иштирок этган.
Айтилишича, сўнгги 12 ой давомида Ўзбекистон аҳолисининг тез-тез профилактик тиббий кўрикдан ўта бошлагани саломатликни асраш, самарали даволаниш имкониятларини ошириш мақсадида касалликларни дастлабки босқичда аниқлашда асосий омил бўлмоқда. Буни ўзбекларнинг 22 фоизи (европаликларнинг 17 фоизи, қозоқларнинг 19 фоизи) қайд этган.
“Энг оммабоп скрининг муолажаси — терапевтик кўрик бўлиб, Ўзбекистон фуқароларининг 58 фоизи мунтазам текширувдан ўтади (Европада ўртача 55 фоиз, Қозоғистонда 64 фоиз). Ўзбекистонда иккинчи ўринни умумий қон текшируви — 45 фоиз (Европада 42 фоиз, Қозоғистонда ҳам 71 фоиз улуш билан ушбу текширув иккинчи ўринда) эгаллаган.
Ўзбекистонда энг кўп ташриф буюриладиган тиббий кўриклар рўйхатида учинчи ўринни стоматологик кўрик эгаллади: аҳолидан 28 фоизи бу кўрикдан мунтазам тарзда ўтиб туради (Европада 61 фоиз, Қозоғистонда 45 фоиз улуш билан тўртинчи ўринда)”, — дейилади тадқиқотда.
Қўшимча қилинишича, Ўзбекистонда респондентларнинг 38 фоизи барча тиббий профилактика кўрикларидан ўтади. Шунингдек, 37 фоиз респондентлар эса уларнинг маълум бир қисмидан ўтишини қайд этган. Ҳеч қандай текширувдан ўтмаслигини таъкидлаган респондентларнинг улуши эса 25 фоизни ташкил этди (44 фоиз европалик, 57 фоиз қозоғистонлик).
Аввалроқ Ўзбекистон аҳолисининг 26 фоизи дори-дармонларга харажатларни қисқартиргани маълум қилинган эди.
Мавзуга доир:
Изоҳ (0)