Туркманистонда Мустақиллик куни (27 сентябрь) муносабати билан президент Сердар Бердимуҳамедов мамлакатнинг судланган 1 180 нафар фуқаросини афв этиш тўғрисидаги фармонни имзолади, деб хабар бермоқда “Олтин Асир” маҳаллий телеканали.

Ҳужжат ҳукуматнинг кенгайтирилган йиғилишида имзоланди. Туркманистон раҳбари озодликка чиққан фуқароларга сидқидилдан меҳнат қилиш, мамлакатда амалга оширилаётган кенг кўламли ишларга ҳисса қўшиш, Ватанга сидқидилдан хизмат қилиш, виждонан қилинган меҳнат самарасини кўриб яшашни тилади.

Давлат раҳбари Туркманистон Давлат хавфсизлик кенгаши котиби, мудофаа вазири Бегенч Гундогдиевга “афв этилган фуқаролар яқин орада ўз уйида, оиласи бағрида бўлиши учун” зарур ишларни амалга оширишни топширди.

Маҳаллий ҳокимликка уларнинг бандлигини таъминлаш топширилди. Туркманистонда бундай тадбирлар одатда унутилмас саналар, жумладан, мусулмон байрамлари арафасида ўтказилади.

Эзиз Бояров