Тошкент шаҳар Чилонзор туманида 29 туп кўп йиллик дарахт кесиб ташлангани ҳақида хабар берилган эди. Дарахтлар кесилган ҳудудда 30 та дарахт ҳамда 1020 та бута экилиши режалаштирилгани маълум қилинди.
Экология, атроф-муҳитни муҳофаза қилиш ва иқлим ўзгариши вазирлиги матбуот хизматининг билдиришича, туманнинг Лутфий кўчасида 28 туп шумтол ва 1 туп заранг дарахти Тошкент Ботаника боғи мутахассиси ҳамда туман Экология бўлими масъулларининг 2023 йил 14-сентябрдаги хулосасига асосан қуригани сабабли кесилган.
Мазкур дарахтлар 2021 йилда полиэтилен плёнка билан ёпиб чиқилгани сабаб қуриб қолган. 2022 йилда ҳолат ўрганилиб, прокуратура органларига қуриганлик ҳолати бўйича ҳужжатлар расмийлаштирилган. Ўша йилнинг август ойида ички ишлар органларига суриштирувга берилган. 2022 йилнинг сентябрида эса ҳужжат тугатилган.
2023 йилнинг май ойида ёғингарчилик ва шамол туфайли Лутфий кўчасидаги қуриган дарахтлардан бири қулаб тушган ва йўл ёпилиб, аҳолига ва йўловчиларга анча ноқулайлик келтириб чиқарган. “Лутфий” маҳалласи аҳолисидан эса қуриган ва йўловчилар ҳаёти учун хавфли бўлган дарахтларни кесиб олиб ташлаш ҳамда ўрнига бошқа ўсимликлар экиш бўйича мурожаатлар ҳам келиб тушган.
Шуларни инобатга олган ҳолда дарахтларнинг ҳолати ўрганилиб, ростдан ҳам қуриб қолгани аниқланган 29 та дарахт кесилган.
Тошкент шаҳар ҳокимлиги матбуот хизмати берган ахборотга кўра, 29 туп шумтол дарахти 2016 йилда трамвай линиясини демонтаж қилиш чоғида илдизлари шикастлангани сабабли қуриб қолган.
Ҳар бир кесилган дарахтнинг ўрнига камида 2 ёшли 10 та шумтол кўчатларини, шунингдек, кўплаб буталар: Сурия атиргуллари, ионимуслар, фотиниялар, лизидийлар, ҳинд настаринини экиш вазифаси қўйилди.
Лутфий кўчаси 2024 йилга мўлжалланган чуқур реконструкция қилиш режасига киритилгани инобатга олиниб, реконструкция тўлиқ тугатилгунга қадар янги экилган кўчатларни суғориш вақтинчалик махсус суғориш машиналари ёрдамида амалга оширилади. Реконструкция ишлари доирасида дарахт ва буталарни автоматик томчилатиб суғориш тизими таъминланади.
Экология, атроф-муҳитни муҳофаза қилиш ва иқлим ўзгариши вазирлиги хабарига кўра, бугунги кунда мазкур ҳолат бўйича Бош прокуратура томонидан аввалги ҳолат ҳамда хулоса берилиши ҳолатларига ҳуқуқий баҳо бериш бўйича ўрганиш ишлари олиб борилмоқда.
Изоҳ (0)