Тошкент шаҳар Учтепа туманидаги 3-сонли болалар шифохонасида шифокорларнинг лаёқатсизлиги сабабли бемор вафот этгани, муассасада тиббий жиҳозлар ва дори-дармонлар етарли эмаслигига хабарлар тарқалди. Тошкент шаҳар соғлиқни сақлаш бош бошқармаси мазкур ҳолат юзасидан муносабат билдирди.
Қайд этилишича, ушбу воқеа жорий йилнинг январь ойида юз берган бўлиб, ҳуқуқ-тартибот идоралари томонидан ўрганилиб, унинг натижаси бўйича жавобгарларга нисбатан тегишли чоралар кўрилган. Шаҳар 3-сон болалар клиник шифохонаси моддий-техник базаси босқичма-босқич янгиланмоқда. Хусусан, 2017 йил Япония гранти асосида болалар жонлантириш бўлими 11 турдаги тиббий жиҳозлар билан таъминланган.
Ўз навбатида, Хитой, Туркия давлатлари грантлари ҳамда “Саломатлик-3” лойиҳаси асосида кувезлар, ИВЛ аппаратлари, беморлар учун фунсионал ва болалар кроватлари, ингаляторлар, биохимик ва гематологик анализаторлар, центрэфуга, микроскоп, автоклав, қурутувчи шкаф, дистилятор, бидистилятор, дозаторлар, ЭКГ ва ЭЙЭГ аппаратлари келтириб ўрнатилган.
2020 йилда физиотерапия бўлими 11 турдаги физиотерапевтик аппаратуралар билан жиҳозланган. Ўз навбатида рақамли рентген, доплер – УТТ аппаратлари, коагулограф, ярим автомат биохимик анализатор харид қилинган.
Шунингдек, шифохонада 2023 йил учун дори-дармон харидига 2 млрд 101 миллион сўмдан зиёд маблағ ажратилган. Бу 2017 йилга нисбатан 3 баробар юқори кўрсаткич. 2022 йил январь ойида муассасанинг “В” биноси жиҳозланган ҳолда фойдаланишга топширилиб, беморларга қулай шарт-шароитлар яратилган. Ёрдамчи бинода қурилиш-таъмирлаш ва реконструкция ишлари олиб борилмоқда.
Изоҳ (0)