Toshkent shahar Uchtepa tumanidagi 3-sonli bolalar shifoxonasida shifokorlarning layoqatsizligi sababli bemor vafot etgani, muassasada tibbiy jihozlar va dori-darmonlar yetarli emasligi haqida xabarlar tarqaldi. Toshkent shahar sog‘liqni saqlash bosh boshqarmasi mazkur holat yuzasidan munosabat bildirdi.

Qayd etilishicha, ushbu voqea joriy yilning yanvar oyida yuz bergan bo‘lib, huquq-tartibot idoralari tomonidan o‘rganilib, uning natijasi bo‘yicha javobgarlarga nisbatan tegishli choralar ko‘rilgan. Shahar 3-son bolalar klinik shifoxonasi moddiy-texnik bazasi bosqichma-bosqich yangilanmoqda. Xususan, 2017-yil Yaponiya granti asosida bolalar jonlantirish bo‘limi 11 turdagi tibbiy jihozlar bilan taʼminlangan.

O‘z navbatida, Xitoy, Turkiya davlatlari grantlari hamda “Salomatlik-3” loyihasi asosida kuvezlar, IVL apparatlari, bemorlar uchun funsional va bolalar karavotlari, ingalyatorlar, bioximik va gematologik analizatorlar, sentrefuga, mikroskop, avtoklav, qurituvchi shkaf, distilyator, bidistilyator, dozatorlar, EKG va EYEG apparatlari keltirib o‘rnatilgan. 

2020-yilda fizioterapiya bo‘limi 11 turdagi fizioterapevtik apparaturalar  bilan jihozlangan. O‘z navbatida raqamli rentgen, dopler — UTT apparatlari, koagulograf, yarim avtomat bioximik analizator xarid qilingan. 

Shuningdek, shifoxonada 2023-yil uchun dori-darmon xaridiga 2 mlrd 101 million so‘mdan ziyod mablag‘ ajratilgan. Bu 2017-yilga nisbatan 3 barobar yuqori ko‘rsatkich. 2022-yil yanvar oyida muassasaning “V” binosi jihozlangan holda  foydalanishga topshirilib, bemorlarga qulay shart-sharoitlar yaratilgan. Yordamchi binoda qurilish-taʼmirlash va rekonstruksiya ishlari olib borilmoqda.