Буюк Британияда Украинага беришга мўлжалланган қурол-яроғ тугади. Бу ҳақда The Telegraph нашри исми ошкор этилмаган юқори мартабали ҳарбий амалдорга таяниб хабар берди.
Нашр суҳбатдошига кўра, Британия расмийлари Украинани ҳарбий жиҳатдан қўллаб-қувватлаш масаласида бошқа давлатларни кўпроқ юкни ўз зиммаларига олишга ундаши керак.
“Биз имконимиз доирасида қурол етказиб бердик. Биз Украинага техник ускуналар етказиб беришда давом этамиз, бироқ ҳозир уларга ҳаво ҳужумидан ҳимоя қилувчи мудофаа тизимлари ва артиллерия ўқ-дорилари каби нарсалар керак, бизда буларнинг барчаси тугади”, — дея суҳбатдошнинг сўзларини келтиради The Telegraph.
Нашр таъкидлаганидек, Буюк Британия аллақачон Украинага 14 та Challenger 2 танки, М270 реактив тизимлари, дрон ва Storm Shadow қанотли ракеталари, шунингдек, минглаб танкка қарши қуроллар, қисқа масофали ракеталар ва зирҳли техникаларни топширган.
2-октябрь куни Буюк Британиянинг собиқ мудофаа вазири Бен Уоллес истеъфога чиқишидан олдин мамлакат бош вазири Риши Сунакни Украинага ҳарбий ёрдамни қарийб 2,8 миллиард долларга оширишга чақирганини айтганди.
Уоллеснинг сўзларига кўра, Ғарбнинг қўшимча қуроллари “Россияга қарши жангни имкон қадар тезроқ тугатиши мумкин”.
Аввалроқ Европа Иттифоқи давлатлари Украинага ўз захираларидан қурол ажратишда давом эта олмаслиги ҳақида Politico нашри хабар берганди. Унга кўра, Ғарб давлатлари Украинанинг қуролга бўлган талабини қондириш учун ишлаб чиқариш тармоқларини етарли даражада кенгайтирмаган.
Изоҳ (0)