Қирғизистон Вазирлар Маҳкамаси Қамбарота гидро электр станцияси (ГЭС) қурилишига тайёргарлик кўриш учун бюджетдан 621,4 миллион сом (7 миллион доллар) ажратади. Бу ҳақда 2024 йилги республика бюджети лойиҳасига таяниб, Economist хабар берди.
Дастлабки маълумотларга кўра, ажратилган маблағлар иш майдонларини тайёрлаш, ишчилар қишлоғи ва кўприк қуришга сарфланади. Август ойи охирида Қирғизистон Вазирлар Маҳкамаси раисининг ўринбосари Бакит Торобоев Қамбарота ГЭС-1 даги ишларнинг тайёргарлик босқичи якунланаётганини айтганди.
Хусусан, йўл қурилиши яқинда якунланиши, подстанция фойдаланишга топширилиши, шунингдек, электр тармоқлари ва туннеллар қурилиши ҳақида маълумот берган.
Қамбарота ГЭС қурилиши
Қамбарота ГЭС-1 нинг режалаштирилган қуввати 1860 мегаватт, ишлаб чиқариш эса йилига 5 миллиард киловатт/соат электр энергиясини ташкил қилиши керак. Электр станцияси қуриб битказилгандан кейин Қирғизистон 34 фоиздан, Қозоғистон ва Ўзбекистон эса 33 фоиздан улушга эга бўлади.
Таҳлилчиларнинг фикрича, қурилиш 4–5 миллиард долларга тушади. Лойиҳа 256 метр баландликдаги тўғон ва қуввати 1860 мегаватт бўлган электр станциясини қуришни ўз ичига олади. ГЭСни 2025 йил охиригача қурилишини якунлаш режалаштирилган.
Изоҳ (0)